Dört günün süresindä Komratta geçer 19-cu şahmata devlet turniri Çok — Maydan küüyün yaşayanın Födor Yanioglonun anması için. O çok kuvet koydu, ki şahmata sportu regionda ilerlesin. Kaldırmaa kendi reytingını hem kazanmaa üüsek erleri geldilär sportçular diil sade Gagauziyadan, ama Moldovanın çoyu dolaylarından.
Födor Yanioglunun anması için devlet turniri topladı 83 sportçu bütün devlettän. O geçer iki gruppada A hem B. Dört günün süresindä genç hem büük yaşta sahmatistlär var nicä kaldırsınnar diil sade kendi reytıngını devlettä, ama kazansınnar ödülleri hem para baaşışlarını. A gruppasında oynȇȇrlar sportçular, angıları professional uurunda şahmatalarlan zanaatlanȇrlar.
«Bu yıl soperniklär taa kavi, neçinki biz her yız çalışȇrız».
«Büün olacek taa zor, nekadar dün, çünkü üç tur geçireriz, olacek vakıt dinnenmää».
«Bän notalȇrım kendi kuvedimi diil ii, neçinki konkurentlar kaavi».
«Büün bizdä devlet turniri, bän umutlanȇrım, ani kazanacam er».
«Çoyu dolaylardan geldilär oyuncular, turnir üüsek uurda geçer».
«Konkurentlär ii,oyun kaavi, hepsi ii».
«Turnir geçer ii, bu olacek ii hazırlanmak, neçiki burada üüsek uurda insannar oynȇȇrlar».
Oluşun ofiţial açılışında mussafirlär hem hazırlayıcılar nışannadılar, ani uşaklar, kim pay alȇr burada, üüsek uurda sora tanıttırȇrlar devleti başka erlerdä. Gagauziya şahmata federaţiyanın başı Viktor Petrov nışannadı, ani bölä turnirlär vererlär uşaklara kolaylık kaavileştirmää kendi bilgilerini şahmata uurunda.
«Bän umutlanȇrım, ani siz gideceniz turnirdän becermeklärlän, ama kim etişmeyecek üüsek uura, yapaceklar maasuz çıkışları da ileri dooru üüreneceklär»,- Viktor Petrov nışannadı.
Gençlik hem sport bakanı Väçeslav Dragoy urguladı, ani bölä yarışmalar yardım ederlär uşaklara taa sigur, açık olmaa, duymaa kendi konkurentını. O hep ölä şükür etti okulun başlarını, ki onnar koyȇrlar bütün kuvetlerini ki şahmatalar ilerlesin.
«İsteerim dilemää ii başarlar bizim sportçulara, angıları gideceklär Alma Ata kasabasına dünnä yarışmalarına, da umutlanȇrım, ani uşaklar üüsek uurda pay alaceklar. Da savaşacez yapmaa hepsini, ki sizin okulunuz ilerlesin. Ki siz geçiräsiniz gözäl turnirleri»,- Väçeslav Dragoy urguladı.
Regional şahamata hem şaşki okulun temsilcileri nışannadılar, ani yıl yıldan zeedelener pay alannarın sayısı, ama yok er nereyı hepsini kabletmää. İnsannar da türlü dolaylardan da geler.
«Şahmatı- bu bölä sport çeşiti, angısı üüreder bizi düşünmää, terbieder ii insannarı, kaavi şahmatistleri, insannarı, angıları ileri dooru götüreceklär bizim devletimizi , hep ölä siz çocuklar üüsek uurda yarışmalarda bulunȇrsınız, neredä siz üürenersiniz dayanmaa, kalmamaa aşaa. Da gidiniz sade ileri».
«Biz bu yıl kazandık 11 ödül devlet çempionatında, burada koyulu büük iş, analar-bobalar da yardım ettilär. Üçü hazırlanȇrlar dünnä hem Evropa yarışmalarına. Var büük şanslar Novak Vadimda».
Turnirin musaafirleri nışannadılar, ani yarışmalar üüsek uurda.
«Reyting turniri, bän getirdim üç uşak, hepsi üüsek uurda oynȇȇr»,- söledi trener.
Yarışmaların çıkışlarına görü te onnar, kim kazanaceklar ilk, ikinci hem üçüncü erleri para baaşışlarını hem diplomnarı kabledeceklär.
Moldovanın hem Gagauziyanın en mekalı haberleri GRTnın Telegram kanalında!