Kazayak küyündä geçti 41-ci sambo devlet turniri adalı Afgan cengindä pay alana Yanev Georgiya. Olay gösterer, ani insannar baş ilderlär bu adamın önündä, angısı Afganistanda geçindi .
Afgan gengindä pay alan Georgiy Yanev duudu hem büüdü Kazayak küüyündä, altı yıl samboya gezdi, taa armatayadan. Georgiy Yanev geçindi, yaparkan asker borcunu Afganistanda. 1984 yıldan beeri onun anması için küüdä geçirerlär devlet yarışmalarını. Bu yıl turnir topladı yakın 100 sportçu bütün Moldovadan, pay alannar geldilär Belţı, Kantemir, Komrat, Kagul, Leovo kasabalarından, Tartaul, Çişmikioy hem Kazayak küülerindän. Düüşlär matta geçtilär kaavi hem kızgın, kimisi istemäzdi taratmaa.
Yarışmaların çıkışlarına görä V. Patapov adına uşak sport okulun Kazayak filialın üürenicileri taradılar 12 kategoriyasında 7-ndä. Onnarın aralarında Aleksandra Taka, Kirill Frangu, Natalya Terzinova, Evgeniy Kovaljı, Egor Kuyujuklu, Vadim Danç hem Pavel Kuyujuklu. Takımnarın aralarında ilk eri kazandılar kazayaklılar, ikinci erdä Belţ komandası, üçüncü oldular Komrat sambistleri.
Turnir hazırlandı V. Patapov adında sport okulunnan, erli kuvetlärlän, gençlik hem sport bakannıın yardımınnan. Sambo hem dzüdo sekţiyası çalışȇr Kazayak küüyündä 1977 yıldan beeri. Büünkü günä burada çalışȇr 70 sportçu. Onun kurucusu MD anılmış treneri Pötr Uzun.
Moldovanın hem Gagauziyanın en mekalı haberleri GRTnın Telegram kanalında!