Kasım ayın 3 — ndä Moldovada Prezident seçimnerin ikinci turu başarıldı. Seçim dolayların kapamasından sora kandıdatlar brifingları geçirdilär. Onnar şükür ettilär insannara ses vermesi için. Baş temalar, angılarını onnar brifingların süresindä açıkladılar, baalıydı devletin ilerlemesinnän.
Aleksandr Stoyanoglo presa için brifingı geçirdi, angısında şükür etti hepsi insannarı onnarın sesleri için. O çizgiledi nekadar önemli, ki hepsi insannarda olsun kendi bakışları.
«Büün siz Moldovanın sesini açıkladınız. Sizin sesiniz kasabaların hem küülerin, poyraz hem üülen, batı hem günduusu tarafların aralarında sınırları yok etti. Sizin pay alması seçimnerdä gösterdi, ani Moldova diil bir nokta gibi kartada, sizin var kendi bakışlarınız, siz cuvaplı halksınız, angısı isteer kendi geleceeni bilmää. Bütün candan şükür ederim sizi, ani inandınız, çıktınız seçimnerä. Herbir insan, kim çıktı seçimnerä, yazdı bu devletin istoriyasının ecelliini»,- nışannadı prezident görevinä kandidat Aleksandr Stoyanoglo.
Presa için brifingında Maya Sandu şükür etti seçicileri, ani aktıv seçimnerdä pay aldılar. O çizgiledi, ani herbir ses devlet için önemli.
«Moldovanın paalı yaşayannarı, şükür ederim herbirinizi onun için, ani çıktınız seçimnerä, bakmayarak ona, kimin için seslerinizi verdiniz. Bu söleer onun için, ani sizin cannarınızda var sevgi kendi devletinä. Şükür ederim Moldovanın hepsi yaşayannarını hem kasabalardan, hem küülerdän, küçük hem büük yaşamak erlerindän. Büün siz gösterdiniz, ani Moldova — o siz, devlet kendi pozitiv olaylarınnan, kendi problemalarlan, kendi halklarınnan, angıların hep var kendi problemaları, düşünmekleri, zorlukları. Ama, bakmayarak buna, siz belli ettiniz, ani Moldova — bir aylä gibi»,- çizgiledi Moldova Devleti Prezidenti Maya Sandu.
Seçimnerin ikinci turun ilk çıkışlarına görä, taa çok ses aldı Maya Sandu -55,41% . Stoyanoglo için ses verdi 44,59% seçici.