Moldovada studentlerä kaldırmaa stipendiyaları neetlerlär 2026 yılın sentäbri ayın birindä. Orta saymaklara görä, ödemeklär var nicä büüsünnär yakın 40 proţenda. Kuvetlär nışannȇȇrlar,ani neet – kaldırmaa devlettä üüretimin ii tarafını göstermää hem tutturmaa studentleri. En büük kaldırmaklar olaceklar onnara,kim üürener tehnik hem pedagogika zanaatlarına.
Studentlär urgulȇȇrlar,ani stipendiyalar oynȇȇrlar büük rolü onnarın yaşamasında. Onnar urgulȇȇrlar,ani o yardım eder kaplamaa temel harcları, herbir üüselmek da olȇr ii tutturmak hem destek üürenmeya.
«Çoyu studentlerdä yok para,almaa bişey satın hem kapamaa kendi zorluklarını, stipendiya yardım eder pek. Ama praktikada, material alȇrız kendi paramızlan, stipendiya da yardım eder. Onun üüselmesi verer havez üürenmeya. Okudum bitki haberleri da nicä bilerim, en büük stipendiya 3600 da üüselmektän sora olacek 4300, da bu ii,var nicä olacek işlämemää,da taa çok vakıdı doorutmaa üürenmeya».
«Sayȇrım,ani stipendiyadan çekiler havez üürenmeya. Uşak görer,ani bişey onda olȇr,da peydalanȇr taa çok havez üürenmää hem savaşmaa buuurda.Bän, örnek gibi, bän obşejitiyada yaşȇȇrım, da çok harç bu uurda var, stipendiya yardım eder,elbetki».
«Sayȇrım,ani havez üürenmeya verecek, olacek ne neetlemää, da olacek havez ii notaları kabletmää. Almaa satın yazal, tefter, ne lääzım üürenmäk için, ruba da. Sayȇrım,ani bu ii tutturmak olacek.Benim klasımda üürener kızçaaz,angısı bin leydän zeedä kableder, da taa 40 proţenda kaldırarsalar, olacek pek ii iş».
«Herbir üürenici isteer kabletmää stiäendiyayı,da bu verer havez üürenmää. Almaa deyni bişey imää, da almamaa bu iş için para analardan-bobalardan».
Üüretim ministrusu Dan Perçun urguladı,ani stipendiyaların üüselmesi -bu önemli adım studentlerin tutturmasında. Onun laflarına görä, bu iş doorulu gençleri havezlendirmää kalsınnar devlettä da üürensinnär milli üüsek üüretim merkezlerdä.
«Halizdän biz neetleriz kaldırmaa stipendiyaları, haliz liţenţiat uurunda, studentlär için,angıları devlettä üürenerlär. Bu bizim denememiz yapmaa evdä üürenmeyi taa uygun bölä tutturmaklarlan. Fayda onnardan en pek kabledeceklär – kim üürener STEM zanaatlara – fizikada, himiyada, biologiyada, arhitekturada, injeneriyada hem başka. Bu büük listä, da taa bu sayıya girerlär pedagogika zanaatları da STEM disţiplinalarda.Ama haliz stipendiyalar üüseleceklär sentäbrinin birindäm hepsi studentlär için.Biz görecek ii kaldırmayı,doorulu ona ki taa uygun yapmaa üürenmeyı Moldovada»,- Dan Perçun urguladı.
Şindiki zamanda Moldovada stipendiyaların sayısı 1000 leydän çekederlär, ayırı kategoriyalara da kurȇrlar 3600 leydän zeedä. Üüsek zameetlär için 4000 zeedä.Bekleniler,ani reformada sora ödemeklär üüseleceklär,ama kabledennerin sayısı iisilecek liţentiat uurunda – 70 proţenttan 50 proţenda, magistraturada da 30 proţenda. Ministrunun laflarına görä, diişilmek proekti şindi bulunȇr annaşmak stadiyasında da yakın zamanda geçirilecek bakılmaya hem kararlamaya parlamentä.
Moldovanın hem Gagauziyanın en mekalı haberleri GRTnın Telegram kanalında!