Baurçu küüyündän eldän yapan işlerini Mariya hem Ekaterina Öküzçü bilinerlär kendi ustacılıınnan. Onnarın evi donadılı el işlerinnän. Onnarın taa çoyu yapılı milli stilindä. Bu ev nicä el işlerin muzeyi, nereyi gelerlär turistlär, angıları Baurçu küüyündä bulunȇrlar. Mariya hem Ekaterina Öküzçü herzaman sevgiylän annadȇrlar kendi zanaatı için.
Kızkardaşlar Mariya hem Ekaterina Öküzçü için el işlerin yapması oldu sevgi zanaat. Onnarın çoyu işleri şaştırȇrlar. Onnarın işlerindä küü peyzajları diriler, eski ornamentlär, çiçeklär hem ikonalar insannara mayıllık verer. Herbir resim- bu çok saatlık işin çıkışları, dayanmak hem dikkatlık herbir ufak yapmaya. Karıların evi dolu sıcaklan, şafklan hem predmetlärlän, angılarını onnar diktilär hem örüdülär kendi ellerinnän. Kullanarak materiyayı hem iplikleri- bitki bitkiya çıkȇr incäzanaat gözellii. Dikmäk — o diil sade resim, o bir istoriya, angısını inää ipliklän annadȇrlar- söleer Mariya Öküzçü.
«Dikmää beenerim. Taa küçüktän havezim vardı da bän dikerim. Küçüktän mamular düzen dokuyardılar, biz dä üürendik dikmää, örümää kofta, sviter, çorap. Hepsini üürendik yapmaa»,- söleer Mariya Öküzçü.
Mariya hem Ekaterina çok yıl koruyȇrlar hem ilerlederlär eski zanaatları- dikmäk hem örmäk. Onnarın evi, nicä muzey, neredä herbir predmet — sevginin, dayanmanın çıkışı, Mariya hem Ekaterinanın dikmelerindä sık görüner milli motivleri- gagauz gergefleri, çiçek kompoziţiyaları, ana erlerin peyzajları. El işleri ayırılȇrlar derinniklän da herbiri onnardan nicä bir küçük istoriya.
«Benim da vardı pek büük havezim dikmää. Diktim ramka, perdä, çiiz. Bän pek beenärdim düzeni, pala dokumaa, parça kesmää, kıvratmaa, eklemää. Te bunnarı hepsini yapardım»,- söleer Mariya Öküzçü.
Üürettilär kızkardaşları malisi hem anası, verip onnara diil sade becemekleri, ama el işinä sayıgıyı. Onnar büük sevinmeliklän paylaşȇrlar kendi bilgilerinnän, üürederäk gençleri el işlerin yapmasına.
«Gelärdilär şkoladan üürenmää. Dikärdilär. Dedilär taa geleceklär, ama gelmedilär. Biz isteeriz gelsinnär uşaklar, üürensinnär da adet kalsın»,- söleer Öküzçü.
Mariya hem Ekaterina Öküzçü- bu bir gözäl örnek, nicä sevda kendi adetlerinä hem aylä sıcaklıına yardım esder ipliklerdän incä zanaat gözelliklerini yapmaa.
Moldovanın hem Gagauziyanın en mekalı haberleri GRTnın Telegram kanalında!