Sevgi halk yaradıcılıına taa sık büüklerdän evlad boylarına geçer , halizdän insan işidärsä pak çalmayı. Kazayak küüyündän Angelina Stamat folklor türkülerini kendi türkücülüün temelinä koydu. Halk türkülerini o çalȇr o soyda , nicä anasından işitmiş.
Аngelina Stamat diil sade halk türkülerini çalan türkücü, o insan, angısı tradiţiyaları diri konuşmakta koruyȇr. Halkın kultura varlıını türkücü anasından kapmış, angısı akapelo çalarmış. Angelina Andreevnaya deyni anası haliz örnekmişti.
«Anam, açan masada çalardı e, büük kardaşım hem kızkardaşım uyuyardılar, ama bän sesläärdim da aalardım. Okadar canım acıyardı anam, ani çalardı garip türküleri, da ne o türkülerdä var. Ozaman annardım, ani zormuşţ çalacam türküyü «Cıvır-cıvır kuşu»,- dedi Angelina.
Büün Аngelina Stamat halk türkülerini çalȇr o soyda, nicä küçüklüündä işitmiş.
«Babum da çalarmış. Anam da ondan işitmiş. Bu türkülär hepsicii – halk türküleri. Annadım, ani türkülär yaşamaktan alınma, ama vakıdın birindä onnarı çalmazmışlar. Biz gençtik, bän delikannıydım. Evlendim rus dilindä türküleri çalardım. Sora, açan garip türküleri çekettim çalmaa, başladılar seslemää»,- annttı türkücüykä.
Angelina Stamat millet varlıını türkülär aşırı savaşȇr korutmaa, neredä da olmasa. Halk türkülerini türkücü konuşkalarda, küüyün yortularında, aşırıda çalȇr. Bulgariyada onun sesini bulgar gagauzları tutturmuşlar.
«Evä gelärkenä Bulgariyadan, uradık bir gagauz küüyünä. Orada sofra koydular. Çok insan vardı, ani kökleri, dedeleri buralardan: Besarabkadan, bizim dolaylardan. Bän orada çaldım, onnar da çaldılar. Gagauz olannar bilerlär o garip türküleri»,- söledi Angelina Stamat.
Нalk türkücüsü Angelina Stamat şen maanileri da çalȇr. Onun repertuarı halkın can renklerini açıklȇȇrlar. Bölä şen türkülär publikayı şennendirerlär.
Angelina Andreevna – halk kulturasını haliz korudan insan. O kendi halkınnan hodullanȇr, Vatanını sever, halk yaradıcılıına pek inceli yaklaşȇr.
«Biz-gagauzlar, pek çoktankıyız, azız, ama çokuz, kaavi ürekli. Pek beenerim Gagauziyayı. Severim insanımızı, milletimizi. Severim erlerimizi, ne biz yapȇrız, adetlerimizi, türkülerimizi – pek severim»,- söledi Angelina Andreevna.
Halk motivlerini hem derin tradiţiyaları birleştireräk, halk türkülerin çalması – kulturanın korunmak marturu.
Moldovanın hem Gagauziyanın en mekalı haberleri GRTnın Telegram kanalında!