Kıpçak küüyündä, düzmäk işlerdän sora, açıldı «Sokol» dinnenmäk lageri. Angı duygularlan uşaklar karşladılar lagerin açılmasını hem angı programa onnarı bekleer dinnenmäk lagerindä, annadȇr bizim korrespondentımız Oleg Duloglo.
Uşaklara dinnenmäk lageri verer ii bir kolaylık geçirmää birkaç unudulmaz gün kendi kafadarlarınnan hem eni dost bulmaa. Sade birkaç saattan sora uşakların üzlerindä islää duyguları var dı nicä görmää.
«Bän burayı geldim dostlarımnan, biz burada dinnenecez, şen vakıdı geçirecez. Beendim geçti yıl burasını, burada pek islää».
«Bän istedim burayı gelmää, çünkü burada eni insannnan tanıştım, cana yakın kişilärlän, kiminnän var ne lafetmää, islää vakıdı geçirmää».
«Bän burada ilk keret. İstedim gelmää, çünkü yokturdinnendiyim lagerdä. Hep istäärdim bu duyguları kabletmää, eni kafadarları bulmaa. Bilärdim, ani burada islää olacȇk, ani bu birleştirecek bizi».
«Şükür ederim hepsini, kim yaptı bizä deyni bunu. Saa olsunnar bizim bakıcılara, lagerin başına, metodistlerä, aşçilara. Saa olsunnar hepsi, kim geldi, bu lager brakacȇk bizim akılımızda unudulmaz duyguları. En çok beenerim burada diskotekaları hem, ani eni dost buldum».
Uşakların anaları hem bobaları da şükür ederlär kuruculara, ani yapılȇr uşaklara kolaylıkları dinnenmäk için.
«Saa olsun hepsi, kim yardım etti açmaa bizim lageri, primara, yardımcılara hem başka işçilerä. Bu islää kolaylık bizim uşaklarımıza deyni, çünkü onnar taa çok vakıt geçirerlär telefonnarda, burada sa, var kolaylık dinnenmää, eni dost bulmaa. Var nicä sportlan zanaatlasınnar, başka erdä kendi talantlarını göstersinnär. İslää, ani bizdä var lager».
«Büün açılȇr bizim lager, bu lagerä geler benim iki unukam. Pek sevinerim, ani kendileri istedilär burayı gelmää. Onnar ölä söledilär: «Biz isteeriz dinnenmää gözäl, buluşmaa kendi dostlarımızlan, ii, gözäl, geçirmää vakıdı».
Kıpçak küüyün «Sokol» dinnenmäk lagerin başı İrina Kaykı çizgiledi, ani uşaklara deyni hazırlandı meraklı dinnenmäk programması, angısı verecek unudulmaz duyguları hepsi uşaklara.
«Biz bu yıl, hazırladık meraklı programa bizim uşaklarımıza. Beş keret gündä onnar iyäceklär, bizim aulun içindä var iki batut, var nica onnarda atlasınnar, üülendä dinnensinnär evlerin içindä, hazırladık onnara baseynayı üzmää deyni, duşlarımız var içanda hem dışanda. Hepsini yaptık büük üreknän»,- dedi lagerin öndercisi.
Kıpçak küüyün primarın yardımcısı Anatoliy Talmaç annattı, ani lagerin açılması için derindä işlär yapıldı.
«Pişeblokun remondunu yaptık, herşey ne lääzımdı stadartlara görä geçirdik. Bütün lagerin territoriyasında yaptık işleri, elektrikayı geçirdik, suyu geçirdik pişebloka, o evlerdä, neredä uşaklar kalȇr, geçirdik kanalizaţiyayı, neredä etmärdi, duş yaptık, şimdi uşaklar var nicä duş kabletsinnär kendi evlerindä»,- primarın yardımcısı nışannadı.
Kıpçak küüyün «Sokol» dinnenmäk lagerindä, angısı işleyecek bir smena — 11 gün, dinnenecek 110 uşak.