Komrat sport meydanında Sportçular hem olimpik akıntı gününü nışannadılar. O Gagauziya sport okullarından hem klublarından 1000 spotçudan zeedä topladı . Diplomnarı hem şükür gramotaları kablettilär trenerlär, angıları devlet, dünnä hem Evropa uurunda çempionnarı terbiettilär.
Komrat stadionunda Sportçular hem olimpik akıntı günündä 1000 sportçudan zeedä pay aldı. GHT topluşu başı Dmitriy Konstantinov nışannadı, ani avtonomiyanın sportçuları büük hodulluklan gagauz bayraanı halklararası arenalarında kaldırȇrlar . Onnar, koyup kuvetlerini, giderlär ileri, urguladı spiker.
«Biz isteeriz açıktan sölemää , ani umutlanȇrız sizä, siz bizim geleceemiz, bizim umudumuz. Sizin çıkışlarınızlan, nicä sölenildi taa ileri, Gagauziyamız devlet uurunda ileri gider, siz üüsek ödülleri kazanȇrsınız»,- urguladı spiker.
Bakannık komiteti başı ilk yardımcısı İlya Uzun nışannadı, ani avtonomiyanın kuvetleri sportun ilerlemesinä yardım ederlär. O sayȇr, ani lääzım taa zeedä bu uuru finanslamaa, da kuvetlär buna giderlär.
«Bän söledim, ani bizim sportçular örnek gibi genç olannara, uşaklara olȇrlar , neçinki sportçu ilktän terbiediler nicä insan, da ona bakȇrlar gençlär»,- Bakannıık komiteti başı İlya Uzun nışannadı.
Gençlik hem sport bakanı Väçeslav Dragoy nışannadı, ani sport okulların material bazası enilener, ki sportçular taa ii koşullarda sınışları geçirsinnär.
«Şindi biz savaşȇrız boksörlara ii koşulları yapmaa, sport meydannarını açmaa , ki uşakların olsun kolaylıkları sportlan taa ii zanaatlanmaa»,- Väçeslav Dragoy nışannadı.
Bu gün şannı adları kablettilär insannar, angıları çok yıl trener çalışȇrlar hem çempionnarı terbiettilär. Onnarın arasında Viktor Mavrodi, Nikolay Baldjı, Dmitriy Bejenuţa, Ȇduard Kınçev. Hep ölä şükürlük gramotaları üüsek başarları kazanan sportçular hem onnarın trenerları kablettilär. Ofiţial açılıştan sora ilin atletika yarışmaları geçtilär, uşaklar kendi kuvedini, becermeklerini gösterdilär. Hep ölä iki zalada voleybolcular toplandılar. Onnar karıların hem adamnarın aralarında matçları geçirdilär.
«Sportlan zanaatlanmaa- busaalık için pek önemni, saalıı kasvileştirer, herbir çocuk hem kız sportlan lääzım zanatlansın».
«Bän sayȇrım, ani bölä günneri pek önemni geçirmää, uşaklar kendi becermeklerini göstererlär, diil sade kendi kuulerindä, ama taa çok insannara».
«İlk — bölä yarışmalar takım ruhunu kaavileştirerlär, pay alannar eni becermekleri kablederlär, toplȇȇrlar, hem saalıını kaavileştirer».
«Sport — bu saalık, her keret formada lääzım olmaa».
Nicä nışannȇȇrlar trenerlär, uşaklar bu günü kendi becermeklerini , karakterlarını gösterdilär , dostlaştılar.
«Benim bakışıma görä lääzım taa çok geçirmää bölä olayları, bu bizim gençlerimizä pek önemni. Onnar lääzım saalıklı yaşamayı götürsünnär»,- trener Sergey Tülü nışannadı.
Sport liţeyin zalasında güreş yarışmaları geçtilär, onnarda bütün avtonomiyadan sportçular pay aldılar, söledi trener Födor Tukan: «Güreşerlär üürenicilär4 çeki kategoriyasında, 40 kiladan — 55 kilaya kadar . Onnarkendi becermeklerini gösterdilär, ki ilk erleri kazanmaa».
Regional şaşki hem şahmatı okulunda en ii şahmatistlär hem şaşıstlär toplandılar, onnarın aralarında çempionnar belli oldular . Partiyalar kızgındılar, urguladı sport okulu başı İvan Velikoglo: «Yarışmalar pek üüsek uurda geçtilär, meraklıydılar. Çok pay alan vardı, şindän 2017 yıldan duumaları uşakları ödülledik. Güreş meraklıydı, onnar gramotaları hem diplomnarı kablettilär».
Hepsi pay alannar, angıları ilk, ikinci hem üçüncü erleri kazandılar , kablettilär diplomaları hem para baaşışlarını.
Moldovanın hem Gagauziyanın en mekalı haberleri GRTnın Telegram kanalında!