Çadır kasabasında var lafta ani su hem kanalizaţiya için paalar var nicä diişsinnär. «Apă-Termo» kurumu teklif etti diiştirmää tarifleri, angıları kuvettä kalêrlar 2020-ci yıldan.
«Apă-Termo» kurumun ekonomisti Varvara Kurudimova açıkladı, ani teklif ediler tarifleri diiştirmää neçinki bitki yıllar şafk hem gaz paaları zeedelendilär. Şindiki tariflär kapamêrlar hepsi harçları.
«2020-i yıldan şindiya kadar suyun paası insannara deyni kurêr 16 ley 20 bani, ekonomika uuruna deyni kurêr 18 ley, 70 bani, kanalizaţiya insan için 18 ley 18 bani, ekonomika uuruna deyni 30 ley. Bütün orta sayı su hem kanalizaţiya için kurêr 37 ley 9 bani»,- Varvara Kurudimova açıkladı.
Kurumun uzmanı haberledi, ani 2020-ci yıldan beeri şafkın paası dört kat zeedelendi. Buna görä lääzımnı olêr tariflerin bakılması hem diişmesi.
«Teklif edilän proektä görä suyun tarifi birtürlü olsun nicä insannara ölä da ekonomika uuruna -25 ley 67 bani, kanalizaţiya da hep bir paada olsun hepsinä — 15 ley, 93 bani. Bütündän orta paa suya hem kanalizaţiyaya kuracek 41 ley 6 bani. Bölä belli olêr, ani orta tarif zeedelenecek 3 leya 97 baniya»,- dedi ekonomist.
Muniţipiya nasaatı hem primariya kayıl olmadılar bu teklif edilän tariflärlän da topladılar sıradan oturuşu bu soruşu bakmaa deyni. Kendi bakışını açıkladı Çadır kasabasının primarı Anatoliy Topal: «Biz kablettik Narȇdan kiyat, ani kasaba nasaatı sölesin bakışını,ani Apa Termo isteer kaldırmaa suyun(paasını). Toplandı sovet, biz diiliz kayıl, isteeriz, ani NARȆ durgutsun bu kaldırmayı da Apa Termoo versin sayıları, neçin isteer kaldırmaa suyu on leya birdän».
Çadırın yaşayannarı kendi düşünmeklerini söledilär, onnarı bu soruş dalgalandırêr.
«Bän düşünerim, ani 16 da bizä paalı geler, neçinki kim pensiyada bulunȇr, kim yok neylän yaşasın — var ölä da insannar, kim yalnız, onnara da zor gelecek — o lääzım düşünsün ekmek mi almaa, osaydı suyu mı ödemää, gazı».
«Zor olacek ölä ödemää, insanda pensiya aaz,kalkmȇȇr. Su, gaz hep kalkȇr, pek zor olacek».
«Var aylelär, ani yok neylän ödesinnär büük tarifleri suya, kanalizaţiyaya. Bän kendim da dekrettayım, pek zor bana da uşaklarlan hepsini etiştirmää, biraz da yardım olsun devlettän».
«Kanalizaţiya için biraz taa ucuzça, ama o para suya gidecek, da hep o olacek».
Tariflerin diişmesindä bitki karar kabledilecek, açan ANRE bakacek hepsi dokumentleri.
Moldovanın hem Gagauziyanın en mekalı haberleri GRTnın Telegram kanalında!