Valkaneş sulamak stanţiyasının işçileri iki yıl aylık kazanç paralarını kabletmeerlär. İşçilerä başka bişey kalmȇȇr davalara daanışmaktan kaarä, ki paralarını çıkartmaa deyni.
Valkaneş sulamak stanţiyası 2011-ci yıladan binnärlän ektar toprak suladı. 35 yılın süresindä kurum başarılı çalıştı, şindi sä dava instaţıyalarında kurumun yoketmesi proţesi için daartışmaklar gider. Bu takım durumda büünkü gün kurum bulunȇr.Kurumu yokedän proţesin öndercisi Nikolay Paslar annattı, ani şindiki zaman, insannarın kazanç paraların vermemesinnän problema çözüler.
«Kurumun yoketmäk proţesi başladı o beterä,ani var borçlar işçilerin önündä hem vergi inspekţiyasına. Bu kanona görä proţedura, açan yok neylän ödeşmää insannarlan. Ama en büük zorluk onda, ani o vaarlıklar,angıları var kurumda, onnar devletin balansında bulunȇr, onuştan biz yok nasıl satalım onnarı da ödeşelim insannarlan»,- dedi Paslar.
Buluşmakta işçilärlän hem kurumu yokedän proţesin öndercisinnän, kurumun eks- başı İvan Toporaş nışannadı, ani pek çok keret danıştı türlü kurumnara, ki yardım etsinnär çalışannara kendi kazanç parasını kabletmää.
«Danıştım, ani yok nasıl ötää dooru tutmaa kurumu, açan yok ekonomika agentleri, yok nasıl kazanmaa da yödemää insannara. 2019 yılda, beş kurum bu takım durumda bulunardı. Büünkü gündä, durum zor, insannar iki yıl aylık paralarını kabletmerlär, 2022 yıldan var davadan karar»,- nışannadı eks- önderci İvan Toporaş.
Nikolay Paslar annattı, angı karar kabledildi kurumun işçilerin oturuşunda.
«Oturuşta kabledildi karar, enidän danışmaa merkez kuvetlerä, ki versinnär izin, satmaa kurumun vaarlıını, da bu paralarlan ödeşmää insannarlan, kapamaa borçları»,- sayȇr Nikolay Paslar.
Valkaneş dolayı başı İvan Kreţu nışannadı, ani hepsi yapılacȇk, ki insannar kabletsinnär kazanç paralarını deyni.
«Bän nicä Valkaneş dolay başı, bendä bu soruşlar ilk uurda, çünkü bizim küüdän insannar kaldılar parasız, çoyu büün aşırıda. O insannar kim kaldı, hepsi artık ihtiär, var çok hasta, te o insan da kim kaldı, biz savaşalım, çalışalım, da verelim onnarın bu zarplatasını»,- çizgiledi dolayın başı İvan Kreţu.
Nicä nışannadı kurumu yokedän proţesin öndercisi, Nikolay Paslar, bütün borçun sayısı 3 million ley kurȇr.