Bitki aftalar Moldovada gözlediler suuklamak hastalıkların hem pnevmoniya olayların zeedelenmesi. Kişinövun uşak infekţiya bolniţasında 100 erä geler 109 paţient.
Moldovada gözlediler suuklamak hastalıın hem pnevmoniya olayların zeedlenmesi uşakların aralarında. Fevral ayında belli oldu 10 bindän zeedä olay. 59 proţent — uşaklar. Mediklär nışannȇȇrlar, ani üüsek temperaturalar yardım ederlär virus ilerlesin. Komrat bolniţasına koyȇrlar uşakları, angıları şansora suukladılar da onnarda belli oldu pnevmoniya yada bronhit, nışannadı bolniţanın doktoru Evgeniya Bratunova: «Tendeţiya bölä, ani bitki aylar hastaların sayısı bolniţada taa çok, nekadar var krivat. Dinnenmäk günnerindä, açan var çok hasta, ama kimseyi evä kolvermeeriz hastaların sayısı 30-dan etişer. Kimär keret olȇr 7-8 danışmak, kimär keret 10, vardı gün, açan 13 uşaa bolniţaya yattırdık. O uşaklar, angılarına bolniţada ilaçlanmaa lääzım. Biz yok nasıl hepsi uşakları, angılarında pnevmoniya belli oldu, bolniţaya alalım, neçinki taa büük uşaklar, angılarında yok temperatura hem onnar normal soluyȇrlar, var nasıl evdä ilaçlansınnar».
Hava temperaturasının diişmesi getirer virusların ilerlemesinä dä, bunun için hastaların sayısı da zeedelener. Çadır kasaba bolniţasının uşak bölümündä 62 uşak bulunȇr, makar ki orayı var nasıl sade 33 kişiyi kabletmää. Pek çok hasta uşak var türlü yaşlarda, nışannadı bolniţanın baş doktoru Natalya Popazoglo: «Var uşaklar şkoladan, uşak başçalardan, hem var küçüklär. Uşak çok var. Bu şansora üç ay- dekabri, yanvar, fevral sürter. Bizdä çok paţient var pnevmomiyaylan hem bronhitlan».
Valkaneş dolayında gözlediler suuklamak hastalıın iisilmesi 30 proţendä, bakarak bıldırkı uurlara. Bu iş için haberledi epidemiolog doktoru Georgiy Geţoy. O nışannadı, ani taa sık hastalanȇrlar uşaklar 17 yaşınadan.
«Yakın 80 proţent hastalanȇr uşaklar 17 yaşınadan. Hastalanȇrlar yaslalarda hem şkolalarda. Pnevmoniyada hep ölä durum. Bıldır sayıya konulduydu 59 olay, ama şindi 43, ne 16 olaya taa aaz, nekadar bıldır vardı. Hastasların sayısı aazalȇr»,- haberledi epidemiolog doktoru Georgiy Geţoy.
Uzmannar danışȇrlar analara- bobalara kendileri uşlaklarını ilaçlamasınnar, ama danışsınnar medik kurumnarına yardım için. Yaşayannar da lääzım hepsi nasaatları yapsınnar, ki suuklamasınnar deyni.
Moldovanın hem Gagauziyanın en mekalı haberleri GRTnın Telegram kanalında!