Komrat muniţipiyasında oktäbr ayın 14-dän suya genä hlorka koyulacȇk. Bu takım informaţiya primariyanın ofiţial saytında peydalandı. Yaşayannar düşünmeklerinnän proţeduranın lääzımnıı için paylaştılar.
Yaşayannarın kimisi şüpelener ondan, ani «Su-kanal» muniţipal kurumu suya pek sık başladı hlorka koymaa. İnsan korkȇr, ani butakım dezinfekţiya malları var nasıl fenalık onnarın saalıklarına getirsin.
«Su kendisi paklanȇr, açan durmȇȇr erindä. Ama her zaman insanı hlorkaylan otalamaa diil lääzım».
«Buna sanȇpidemstanţiya lääzım laborator çıkışlarını geçirsin. Er lääzımsaydı, ozaman koysunar, ama su isläseydi, ozaman diil lääzım bunu yapmaa. Zerä insan susuz kalȇr. Hepsi etiştirmeer su hazırlamaa».
«Şindiki zaman türlü maasuz mallar su paklamak için var, angıları fenalık insana getirmeer. Var nasıl hlorkayı kullanmamaa da. Sayȇrım ki onun sık kullanılması prost bir iş. Nereyi bu su gide»r.
«Elbetki diil yakışıklı. Prost, açan hiç haberlenilmedik suya hlorka koyulȇr. İnsan hiç hazırlanmaa da etiştirämeer».
«Açan su yok, satın alȇrız. Ama su paalı, biz dä pensiyada, para etişmeer. Susuz da yok nasıl durmaa».
Başka insannar suyun dezinfekţiyasınnan kayıl, bakmayarak ona, nekadar sık yılda yapılȇr.
«Bu lääzımnı bir iş saalık için. Düşünerim, ani bu yapılȇr açan suda kimi kurtçazlar başlȇȇr peydalanmaa».
«Elbetki sık yapılȇr, ama yapılmasın sık, olaceydı mı su pak».
«Şindi türlü hastalıklar var. Bilerim, ani her zaman birdamna hlorka lääzım koyulsun, bizdä sa yılda birkaç sıra koyulȇr, ama hep bu lääzım yapılsın».
Cuvap, nekadar lääzımnı hem kaç vakıt suya dezinfekţiya yapılacek Su-kanal kurumundan hem Saalıı korumak merkezindän biz bu gün ölä dä kabledämedik. Ne kendileri, ne telefonda kurumnarın temsilcileri bizimnän baalanmadılar. Lääzım nışannamaa, ani suya hlorka var planda oktäbrinin 14-ndän koymaa.
Avtor: L.Novak, operator: V.Kıssa, montaj: İ.Rezuneţ