İki eni kiyat dünneyä tanıttı araştırıcı, yazıcı Kosti Kurdoglu. «Ana-boba evi» romanı hem «Dedelerin diveç sesi» povesti prezentaţiyası Gagauziya Regional Resim galereyasında geçti.
Kosti Kurdoglu Gagauziyada anılmış aaraştırıcı hem yazıcı. Büünkü günädän o aaraştırıp hem zengin material toplayıp, 15-tän zeedä istoriya kiyadını yazdı hem tiparladı. Birkaç yıl geeri ama artistik yaratmalarına da ilk adımnarı yaptı. Ozamandan başlayan yolun berekedini o büün «Ana-boba evi» romanı hem «Dedelerin diveç sesi» povesti gibi dünneyä tanıttı.
«Yazıcı kişiyi yakışmȇȇr hiç bir zaman durgutmaa. O herzaman işleer,çünkü onun damarlarında bu var, ürää çeker yazmaa. Bir kiyat yazȇrsın da sevinersin. Yaradıcı yolu ölä, ani o diil uz yol, sapȇrsın, kösteklenersin, durgunȇrsın, ama bän pek istäärdım Ana dilimdä yazmaa. Da şükür Allaha, ani bu şansora 3-cü kiyadım gagauz dilindä»,- Konstantin Kurdoglunun nışannadı.
Kiyatta yazdırılı olaylar hem personajlar Konstantin Kurdoglunun yaşamasından alınma olaylar hem personajlar, nışannadı avtor: «Herbir avtor alȇr kendi yaşamasından örnekleri da erleştirer, dizer artistik uurunda kiyada. Elbetki, bu kiyat povest janrosunda yazdırılı».
Publiţist, dokumentalist, materialları arhivlerdä arayan hem bir erä toplayan- bölä biz biläärdik Konstantin Kurdogluyu öncä, ama büün o taa bir önemni talantını bildirdi:roman hem povest yazmasında, açıkladı MD Parlamenti eks-deputatı İvanna Köksal: «İnsan, angısı üüredicilik yaptı bütün yaşamasında, sport sevän, Gagauziyamızı kurannarın arasında bulunan hem da gagauz yazıcılar birliini kuran bir insan. Hiç durmadaan çalışan, savaşan, yaradan. Bän büün büük mutluluklan katılȇrım bu iki kiyadın prezentaţiyasına».
Kiyatların prezentaţiyasında pay aldılar bibliotekacılar, studentlär, yazıcılar birliin azaları.
«Bölä gözäl Allaa vermiş da o kafası yukarda taşıyȇr bu vergiyi, izmet eder halkına da brakȇr bizlerä, evladlara ölä bir zenginnik, angısını biz başka kiyatlarda bulamayacez».
«Bän kiyadı nekadar elimdä tuttum, gittikçä aarlaşȇr. Düşündüm, ani bunu tutmaa deyni lääzım olmaa kaavi hem çetin, ama onu yazmaa deyni taa da kaavi hem çetin olmaa lääzım. Bilerim , ani Konstantin İvanoviçtä var bu ürek hem da açan olȇr kiyatların prezentaţiyası taa kaavi olsun hem gurur onun içindä lääzım olsun».
Kiyatları tiparlamaa deyni finanslar “Gagauz dilini kurtarma” fondundan, Basılma malların tiparlanması, enidän basılması ham satın alınması uurunda kuruluşlararası komisiyanın kararına görä verildilär.
Moldovanın hem Gagauziyanın en mekalı haberleri GRTnın Telegram kanalında!