Sobaların hem gaz kotölların hem elektrik tertiplerin kullanmak kuralların bozulması olȇrlar yangınnarın sebeplerinnän kış zamanında. Bunun için Gagauziyanın hatalı olaylarda bakannıı yalvarȇr insanı hepsi yangına karşı kuralları esaba alsınnar hem yapsınnar.
2025-ci yılın çeketmesindän devlettä oldu yakın 300 yangın, angılarında 29 kişi öldü. Gagauziyada kurtarıcılar yılın çeketmesindän 5 yangın sündürmesinä çıktılar, da orada kimsey zararlanmadı. Yangınnarın taa sık sebeplerinnän olȇrlar sobaların kullanmasında diil dooru kuralların yapılması, haberledi Regional hatalı olaylarda bakannıın baş uzmanı Nikolay Nikologlo: «Bunun için isteeriz aklınıza getirelim önemni kuralları, ki sizin evleriniz hem yaşamalarınız korulu olsunnar. Sobaları yakarkana yasak ediler brakmaa sobaları bakımsız hem da koymamaa uşakalar onnar baksınnar, kömürü, odunnarı hem başka yakmak materialları lääızm koymaa maasuz erlerä soba yanında, yakmaa sobaları, angılarını yok nicä gazlan, kömürlän yada kokslan yakmaa o odalarda, neredä geçerlär toplantlar yada başka olaylar hem da pek yısıtmaa sobaları da diil lääzım. Vatandaşlar unutmayın! Kuralların yapılması kurtarȇr yaşamanızı. Eer hatalı olay razgelärsäydi, açın telefonu 112».
İnsanın aklına getirerlär, ani yangına karşı kuralların yapılmaması elektrik tertiplerin kullanmasında var nasıl tragediyaya getirsin. Bu tertiplerin yannarında diil lääzım erleştirmää predmetleri, angılar ilin yanmaa çekederlär, ölä nicä mobila, çarşaflar hem başka rubalar.
Moldovanın hem Gagauziyanın en mekalı haberleri GRTnın Telegram kanalında!