Taraklı kasabasında andılar bulgar halkın kahramanını Vasiliyi Levski — o bulgar istoriyasında baş aktivistti, angısı serbestlik için verdi kendi yaşamasını.
Vasiliy Levskiy anmak taşında geçti olay, neredä musaafirlär, administraţiya uzmannarı, okulların üürenicileri, kasaba yaşayannarı koydular çiçekleri anmak taşına. Bölä onnar başlarını iilderlär revolüţionerın Vasiliy Levskiy önündä, neçinki o serbestlik için güreşärdi.
«Vasiliy Levskiy — o revolüţioner, biz lääzım bunu bilelim hem herzaman akılımızda tutalım onun yaptıklarını».
«Vasiliy Levskiy hatırınnan biz yaşêêrız büün demokratiyalı devlettä».
«Vasiliy Levskiy -Serbestlik Apostolu. Verdi kendi yaşamasını Bulgariya için, istedi, ki devlet serbest olsun».
«O çok yapmıştı Bulgariya için, önemni bilmää hepsini, kim kuvedini bu uurda koydu».
Çiçek koyulmasından sora Vasiliy Levskiy adına gençlik merkezindä geçti literatura hem muzika programası.
Taraklı dolayı üüretmäk bakanı Liliya Sarsaman urguladı, ani bulgar halkı lääzım korusun kendi özelliini.
«Vasiliy Levskiy -o istoriyada büük hem önemni kişi. Biz, bulgar halkı, hem hepsi bu millet Moldovada, açan akılımıza getireriz Vasiliy Levskiy adını, biz kendimizi birleşik duyêrız bütünnä bulgar halkınnan, bizim dedeleremizlän»,- Liliya Sarsaman urguladı .
Üüretmäk hem Aaraştırmak Ministerlii millet aralarında ilişkileri izmeti başı İvan Duminika söledi, ani Ministerlik barabar Taraklı dolay nasaatınnan geçirerlär Vasiliy Levskiy anmak günnerini.
«Geçirilerlär açık derslär, sergilär, bunnardan kaarä çiçek koyulmakları Vasiliy Levskiy anmak için. Hep ölä da okullara kiyatları, üüretmäk posobiyalarını vereriz, üüredicilerä yardım, metodistlerä,kim istoriya hem adetlär derslerini götürer»,- İvan Duminika söledi.
Taraklı dolayı başı Lazar Dermenji nışannadı,ani Vasiliy Levskiy adı lääzım diveç yaşasın, genç evlad boyları da bir zaman da diil lääzım unutsunnar onun kurbannıını.
«O adam ideya için güreşärmişti, bulgar revolüţioneri, en ilkin o ūzerä, ani bulgar halkın serbestliini isteyärmişti.Onuştan o büük bir örnek olêr, onu için biz annadêrız bizim genç evlad boylarımıza»,- Lazar Dermenji nışannadı.
Tarakliyada Vasiliy Levskiy anmak günü hep üüsek uurda bakılêr, hem gösterer, nekadar önemni, ki bulgar halkı unutmasın kendi istoriya sayfalarını.
Avtor: A. Karapirä, operator hem montaj: L. Arfonos
Gagauziyanın en mekalı haberleri GRTnın Telegram kanalında!