Komratta 10-cu halklararası taekvondo turnirı geçti. Turnirä Moldovadan hem Rumıniyadan 300-dän sportçu katıldı. Yarışmalar, stadionun sport salonunda yapıldı.
Bu yarışmalarda her yaş grupundan spotçular kendi becermeklerini gösteräbildi — en küçük çocuklardan, haklararası ödülleri alan sporculara kadar. Onnar üç dayanda geçtilär. Tatamiya enküçük sporcular, taekvondo yolunda çekedip kendi sport kariyerasını becerikli sportçularlan, angıları halklararası yarışmalarda ödülleri kazandılar, çıktılar. Herbir düüştä teknik, hızlılık hem dayanıklılık gösterildi. Sporculara görä maçlar çok kızgın geçti, konkurentlar da kaaviydi.
«İki keret turnirä katıldım, ikinci oldum, şimdi üçüncü oldum».
«İlk keret katıldım, konkurentım bendän yaklaşık 20 yaş büüktü, ama çok hoşuma gitti. Neçinki ilk keret ii gider, ama birazı var nasıl taratsın».
«İlk keret yaraşȇrım da üçüncü oldum, hazırlanmaklan çok mutlu kaldım, ileri dooru sıkı hazırlanacez».
«Yarışmalar üüsek uurda hazırlı, bän büün iki düüş geçirecäm, umutlanȇrım ilk eri kazanmaa».
«Biz geldik yarışmalara Gagauziyaya, konkurenţiya pek ii. Biz savaşȇrız taramaa».
Trenerlär urguladılar, ani herbir güreşmäk gösterdi, nekadar uşaklar hazırlı. Onnar savaşȇrlar diil sade üüretmää sportçuları tehnikaya, ama kaavileştirmää karakterı, komanda ruhunu hem inanı kendinä.
Aleksandr Mitioglo, Komrat sport okulu treneri, nışannadı: «Düüşlär geçerlär kızgın , bizim uşaklar göstererlär karakterini da isteerlär taramaa».
Natalya Valük, Tiraspoldän trener, açıkladı: «Var ilk erlär, ikinci hem üçüncü . Yarışmalar geçerlär Komratta 10 kerä da biz 10 kerä sizä geleriz tutturmaa deyni sizi».
Oleg Çornıy, Kişinövdän trener, belli etti: «Nicä her keret kızgın, kaavi düüşlär geçer. Uşaklar en küçüklerdän 5 yaşından senyorlaradan — hepsi isteer taramaa. Hepsi geldi burayı güreşmää deyni ödüllär için».
Komratta sport okulunun başı Gavriil Tulba bildirtti, ani bu önemli bir olaydır. Komrat — halklararası merkezi olȇr da uşaklar kazanȇrlar eni becermekleri.
«Thȇkvondo Gagauziyada — pek genç sport, ama ileri gidän, pek önemni, ani o çeketti ilerlemää bizim sport okulumuzda. 10 yıl sıradan bu turnir birleştirer sportçuları türlü devletlerdän hem ihandırȇr gelecek çempionnarı»,- Gavriil Tulba bildirtti
300-dän zeedä katılan pay aldı. Bu turnirlär terbiederlär saalıklı yaşamayı hem açȇrlar eni kolaylıkları gençlerä deyni, dedi Gençlik hem Sport bakanı Pavel Tulba: «Gagauziyaya deyni thȇkvondo- eni bir sport soyu, ama aktiv ileri gidän kendi adetlerinnän, geografiyasınnan, angısı her keret genişlener da kaplȇȇr bütün Gagauziyayı».
Komrat kasabanın primarı Sergey Anastasov söledi, ki halklararası yarışmalar kasabanın imedjını kaldırȇr hem sportu ilerleder.
«Sport — diil sade büük başarlara etişmää. Bu sizin saalınız. Zanaatlanın sportlan. Sevindirin bizi. Biz da yapacez sizä hepsini, ki bölä yarışmalar geçsinnär her yıl»,- Komradın primarı Sergey Anastasov söledi.
Turnirın baş neeti- ilerletmää thȇkvondoyu hem genç sportçuların terbietmesi, urguladı Gagauziya thȇkvondo federaţıya başı Väçeslav Dragoy: «Komrat, Vulkaneștı hem Kıpçakta bölümneri açtık, yaklaşık 200 sporcu çalışȇr. Onun için biz ilerleeriz».
Davacılar gözlettilär nicä sportçular tehnikayı yaptılar hem kuralları baktılar, siiredicilär da onnarı tutturdular.
«Aslıdan, bölä kalabalık yarışmalar sık olȇr da bu ii bir iş, çünkü sportcuların sayısı çok. Biz buna her zaman sevineriz. Bän ilk keret davacı olarak er alȇrım»,- yarışmanın davacısı Üliana Kovalskaya nışannadı.
Yarışmaların sonunda tarayıcılar kablettilär diplom, ödül hem baaşış Çoyuna için bu sadece ödül diil, ama motivaţiya ilerletmää sınışları hem etişmää üüsek başarlara. Halklararsı turnir Komratta belli etti, ani sport birleştirer insannarı bakmadaan yaşa hem sınırlara.
Moldovanın hem Gagauziyanın en mekalı haberleri GRTnın Telegram kanalında!