Kirsovo küüyün gimnaziyasında geçti voleybol turniri, angısı adalıydı Çernobıl atom elektrostanţiyasında avariyanın 40-ci yıldönümünä. Sportzalda buluştular komandalar Komrattan, Çadırdan, Tomaydan hem Kirsovdan. Yarışmaları onuncu keret geçirer küü primariyası- anmaa deyni onnarı, kim katıldı katastrofa çıkışların yok etmesinä.
Çernobıl için taa siirek yaşamakta anȇrlar- sıra geler onun için taa sık aklına getirmää. En pek gençlerä, angıları tragediya için bilerlär sade haberlerdän. Bunun için söleer Gagauziya çernobil avariyanın likvidatorları cümnenin başı Ȇmmaniul Velikov, bulunarak buluşmakta uşaklarlan üüretmäk kurumnarın birisindä.
«Söledim kimim bän da ileri dooru lafederim- siz işittiniz mi Çernobıl için- kaldırın ellerini. Orada iki kişi kim yakından bunun için biler, kalanı bişey bilmeer. Ama bunu uşakalr aklında tutaceklar, ani şindi yapȇrız. Bu tragediya, angısı diil lääzım tekrarlansın»,- Ȇmmaniul Velikov dedi.
Bu neetlän Kirsovada her yıl geçer anmak voleybol turniri . Sport atmosferanın ardında özel istoriyalar, angıları şindi dä acıdȇrlar. Mariya Savelyevna Koynak kaybetti iki yıl geeri kocasını. O günü, açan onu aldılar onun kızı 9 yaşındaydı.
«O herzaman televizorda kolverimneri bakardı… Girerim- gözlerindä yaşlar. Söleerim: «İlüşa ne oldu ?» O da bana: «Mariya burada Çernobıl için göstererlär.. ne sän bilersin… İstemäzdi, hepsini kendi içindä tutardı» », — Mariya Savelyevna Koynak nışannadı.
Mariya Hadjioglo aklına getirer, nicä onun kocası geldi likvidaţiyadan sora pek hasta.
«O işledi orada 17 gün da hastalandı. Yaralarlan bütünnä. Yolladılar gospitalä Kieva. Açan geeri geldi bän onu tanımadım, bütünnä bintlan sarılıydı»,- Mariya annattı.
Büün likvidatorların kahramannıı için bilerlär unukalar.
« Biz lääızm bilelim onnarı kim kendi yaşamasını bizim için verdi, ki biz yaşayalım açık gök altında», — İgor Hadjioglo likvidatorun unukası açıkladı.
Çernobıl avariya çıkışların yok etmesindä pay alannar aklına getirerlär o zor günneri.
«Bütünnä giinersin- protivogaz, rezina. Sokȇrlar maşınayi- avtobuz yada BTR da sän lääzım onu yıkayasın. Kontrol ederlär radiaţiyayı eer varsaydı geeri urȇrlar. Ozaman bizi gençleri orayı alardılar. Şindi biz aaz kaldık».
109 çernobıl avariyanın likvidatorların sayısından Gagauziyada diri kaldı 53. Bakmayarak bölä sebepä turnir geçti sıcak atmosferada, nışannadılar olayın pay alannarı. Vitaliy Kunçev için Çadırdan bu ilk bölä yarışmalar.
«Vardı zor momentlär, elbetki. Komandalar savaşȇrlar, çoyu onnardan isteerlär göstermää kendilerini. Bu pek islää, açan var interes oyuna»,- Vitaliy Kunçev nışannadı.
En ii kendisini gösterdi Çadırdan komanda. Ayırı belli oldular en ii oyuncular- Kirsovo- Stepan Sirkeli, Komrattan Ȇduard Vellikov,Çadırdan- Vitaliy Kunçev, hem Tomaydan- Denis Kirçioglo. Turnirin kurucusunnan10-ncu keret oldu küü primariyası. Nicä nışannadı primar yardımcısı Dmitriy Dragan bölä buluşmakalr – bu diil sade sport, ama kolaylık korumaa diri anmayı insannar hem olaylar için.
Moldovanın hem Gagauziyanın en mekalı haberleri GRTnın Telegram kanalında!