GRT CK Kirsovo küüyündän M.Tuzlov adına liţeyindän 11-ci klasın üürenicileri geldilär. Gençlär Gagauziya Radio hem Televideniya işinnän tanıştılar hem nicä programalar, haberlär yazılȇrlar gördülär.
M.Tuzlov adına liţeyistleri TV hem Radio studiyalarında seftä bulundular, onnar kendilerini jurnalistlär erindä denedilär hem kadr ardında işinnän tanıştılar. Uşaklar var olan duygularınnan paylaştılar hem annatılar istedii zanaatlar için.
«Beendim, nicä burada iş koyulu. Çok enilik kendimä aldım, deyecez:nicä muzıka kontrol ediler, nicä haberlär yazılȇrlar, nicä radioda hepsi işleer. Angı günnerdä nesoy programalar yayınnanȇrlar üürendim. Başlayacam düşünmää bu zanaat için da».
«Hepsindän pek radioda işi sevdim, nicä yayın götürüler, studiya erleştirili. Proţes meraklı».
«Gezintiyä üüredicimiz getirdi. Hepsindän pek atmosferayı burada sevdim, nicä çekimneri götürerlär, intervyu alȇrlar. Jurnalistika zanaatı için düşünärdim, ama taa bilmeerim, nesoy zanaatı seçecäm».
«Gezintimizi beendim. Meraklı geçti. Diktor erindä oturdum, operatorluk işini denedim».
Üüredici Viktoriya Fedotova söleer, ani butakım gezintilär uşaklara yardım ederlär zanaatları seçmää hem real zamandaş media kolaylıklarını görmää.
«Üüretmäk programasına görä, uşakların seçtii kursları var. Bu kurslara görä, biz Mas-media çalışmasını geçeriz. Kim yayının öbür tarafında bulunȇr, haberlär, programalar, nicä hazırlanȇrlar hem götürülerlär tanışȇrız hem deneriz. Bu kursun çerçevesindä plannardaydı GRT kompaniyasına gezintiya gelmää. Çoyu üürenicilerdän jurnalistika zanaatınnan kendi yaşamasını baalamaa umutlanȇr, bu tanışmak onnarın gelecek zanaatına yardım edecek»,- Viktoriya Fedotova söleer.
Üüredici söleer, ani bu gezinti uşakların zanaat seçmesinä bir adım olacek.
Moldovanın hem Gagauziyanın en mekalı haberleri GRTnın Telegram kanalında!