On bin kaçıknnardan Ukrainadan, angıları Moldovada bulunȇrlar , 2 bin 600 — uşaklar, angıları girerlär Moldovanın milli üüretim sistemasına. Onnarın üürenmesi için kurulȇrlar hepsi lääzımnı koşullar- üüretim resurslara yaklaşmak hem kendi ana dilini — ukraina dilini üürenmesi.
Moldovanın üüretim sisteması savaşȇr diil sade durgunmaz üüretmää uşakları, angıları kendi ana topraandan gittilär, ama korumaa onnarın dil hem kultura özelliklerini. Bu üzerä 2024-cü yılda sentäbrinin birindä ilk keret açıldı dört klas Ukrainadan kaçkın uşakları için. Bu iş için haberledi MD Üüretim ministerliin milletlär arası ilişkileri izmetin başı İvan Duminika: « Onnarın taa çoyu Odesa bölgesindän, ama var Kievdan da. Ama ne en meraklı? Ani Moldovaya gelerlär kaçkınnar, angıları nezamansa Evropaya gittilär. Da açan onnar işiderlär, ani Moldova temsil eder üüretmeyi onnarın ana dilindä ukraina dilindä da taa açtı bir üüretmäk kurumunu Taras Şevçenko adına gimnaziyasını, neredä var nicä hepsi predmetleri ukraina dilindä üürenmää/ ama rumın dilini mutlaka üürenmää lääzım».
2 bin 600 ukraina uşaklardan, angıları girerlär Moldovanın üüretim sistemasına 380 üürenerär Taras Şevçenko adına gimnaziyasında. Kalan üürenicilär pay edili devletin türlü dolaylarında, neredä üürenerlär erindeki okullarda. Uşaklar Ukrainadan kaçkınnarın aylelerindän hep ölä gezerlär avtonomiyanın gimnaziyalarına hem liţeylarına, neredä onnar için kurulu hepsi koşullar üürenmäk için, sınaşmak için hem integrtaţiya için üüretim uuruna. Nikolay Tretyakovun adına liţeyindä Komrat kasabasında üürener on kaçkın uşak birinci klastan 9-cu klasadan. Da nicä nışanandı üüretim kurumun başı Polina Pıntä bu üürenmek yılında iki uşak Ukrainadan başarȇr gimnaziya ţiklasını.
« Hepsi onnar üürenerlär birtülü programaya görä başka uşaklarlan. Ama onnara taa ilin olsun deyni programanın materiallarını annamaa hem üürenmää onnara ekelmäk izmetlär temsil edilerlär proektä görä, angısına biz katılȇrız. İngliz rumın dillerindä eklemäk derslär var. Psigolog izmetlerini temsil ederiz hem üürenicilerä hem analara-bobalara lääzımsaydı. Kimä yardım lääızm danışȇrlar bizä da biz kolaylıkları temsil ederiz»,- Polina Pıntä nışanandı.
İvan Duminika haberledi, ani Taras Şevçenko adına gimnaziyada koyulu plana açmaa beş eni klas ukraina dilindä üürenmeklän, ama rumın dilin üürenmesi mutlaka olacek, nicä lääzımnı predmet.
«Lafettik, ani lääzım beş klas düzmää, vermää deyni uşaklara kolaylık ii koşullarda üürenmää»,- İvan Duminika haberledi.
Moldova kuvetleri unutmȇȇrlar kendi vatandaşları için ukraina milletlerdän. Taa sık devletin türlü dolaylardan gelerlär danışmalar hem kiyatlar üüseltmää hem kaaviletmää ukraina dilin üürenmesini, genişletmää üüretmäk programaları hem kolaylıkları, angıları doorudulu onun üürenmesinä hem populärizaţiyasına, nışannadı İvan Duminika. Bunun için işlettirildi 2026-ci yılına plan ukraina dilin üürenmesindä hem ilerlemesindä ukraina toplulukların aralarında Moldovada. Onnarın arasında Ukrainadan kaçkınnar da .
Moldovanın hem Gagauziyanın en mekalı haberleri GRTnın Telegram kanalında!