Üüretim ministerliin temsilcileri Komrada geldilär. Onnar 1-ci uşak başçasında bulundular. Vizitin neeti — görmää, nicä burada gagauz dilini üürenerlär hem dä uşak başçaların öndercilerinnän birliktä var olan zorlukların çözümünü bulmaa.
2015-ci yıldan beeri Gagauz Erindä uşak başçalarında bilingval üüretmäk programası giriştiriler. Uşaklar küçük yaştan rumın hem gagauz dillerini üürenerlär. Kirsovo Küüyündä sä rumın hem bulgar dillerini üürenerlär, kendi becermeklerini ilerlederlär. Üüüretim ministerliindän gelän musaafirlerä 1-ci uşak başçasının uşakları kendi dil kompetenţiyalarını gösterdilär. Dersi Natalya Kroytor geçirdi.
Üüüretim ministerliin temsilcileri çizgiledilär, ani Gagauz Erini ana dilini ilerletmäk uurnda çalışmasını üüsek notalȇrlar. Hep ölä urguladılar, ani devlet uurunda multilingval üüretmäk programasını giriştirmää neetlenerlär. Da bu uurda avtonomiyanın görgüsü hem beceriklii islää bir örnek var nasıl olsun, söledi Multilingval üüretmesi uurunda konsultant Tatayana Stoyanova. Çünkü burada Multilingval üüretmäk programası artık birkaç yıl başarılı giriştiriler. Zengin metodika bazası kuruldu. Butakım üüredicilär işlerini sıraya koydular, üürenicilär sä kolay hem havezlän bu sistemaya görä üürenerlär. Bilgi kaliteleri hem dä dil kompetenţiyaları yıl-yıldan üüseler.
«Biz birliktä düşünelim lääzım, nicä ana dilinin üürenmesini ileletmää var nasıl. En ilkin avtonomiyaya yardımcı olalım, da taa sora üüretim kurumnarına nasaat edelim, ki bu metodları kullansınnar»,- söledi Multilingval üüretmesi uurunda konsultant Tatayana Stoyanova.
Üüretim ministerliin uzmanı Viorika Negrey söledi, ani hepsi zorlukların çözümünü bulmaa lääzım.
«Biz gagauz dilinin perspektivalarını aaraştırȇrız. Biz isteeriz kurikulumun istediklerinä görä üüredicilerin sayısını da belli etmää»,- Viorika Negrey söledi.
Çizgileeriz, ani fevral ayında Üüretim ministerlii uşak başçalarının işçilerinin sayısını belli etti. Ama bu dokumenttä gagauz dili üüredicileri yok. Bu raatsız etti Üüretim bakannıını, uşak başçaların öndercilerini hem üüredicileri. Onnar ministerlää danıştılar, istedilär, ki bu dokumentä diişilmekleri giriştirsinnär.
«Biz buradayız, ki birliktä bir çıkışı bulalım»,- söledi İvan Duminika, Üüretmäk ministerliin temsilcisi.
Üüretim bakannıın başı N.Kristeva çizgiledi, ani avtonomiyada gagauz dilinin üürenmesi ilelerleyecek, bakmayarak ona giriştirecek mi Ministerlik dokumentä diişilmekleri osaydı giriştirmeyecek mi. Ama en büük zorluk — finanslamak.
«Biz isteeriz, ki bu dokumentä gagauz dili üüredicileri yazılı olasunnar. Bu kanona görä yapılsın. Çünkü herbir primarıyanın olamayacek kolaylıı bu uzmannara onnarın ay paralarını ödemää»,- Kristeva çizgiledi.
Gagauz Erin uşak başçalarında 75 gagauz dili üüredicisi var. Onnarın ay paralarını ödemää deyni yılda 15 million ley lääzım. Viorika Negrey söledi, ani tezlää uşak başçalarının finanslamak sisteması diişsin var nasıl.
«Kendibaşına finanslamak var nasıl olsun. Nicä bu okullarda. Uşakların sayısına görä para verilecek. Biz bileriz, ani bu metoda görä üüretim kurumnarın finans kolaylıkları taa üüsek oldu»,- Viorika Negrey söledi.
Gagauz Eri uşak başçaların öndericileri Üüretim ministerliin temsilcilerinä kendi bakışlarını açıkladılar. Onnar umutlanȇrlar, ani bu yakınnarda maasuz dokumentä diişilmeklär giriştirileceklär, da kalan uzmannarın listesindä gagauz dili üüredicisi da olacȇk. Çizgileeriz, ani uşak başçalarında işlemää hakları olan uzmannarın sayısını belli edän dokument bu yılın avgust ayında kuvedä girecek.
Moldovanın hem Gagauziyanın en mekalı haberleri GRTnın Telegram kanalında!