Olimpieţ regional lageri kendi kapularını bu yıl seftä uşaklara deyni açtı. iül ayın 18-dä ilk smena işlemää başladı. Komradın kultura evin önündä toplandılar uşaklar hem ana-bobalar. Kimsä lagerdä başka yıllar vardır dinnendii, kimisinä sä bu ilk gitmäk lagerä. Amma herbiri onnardan dalgalanȇr hem eni duyguları bu dinnenmektän bekleer.
Bakmayarak türlü zorluklara hem engellerä Olimpieţ lageri uşakları kableder bu yıl da. Nicä açıkladı Gagauz Eri Sport hem gençlik bakannıın başı V.Dragoy, açılışa hazırlanmak proţesi zordu, ama uzmannar eterli kuvet koydular da onnarın çalışmalarınnan lager uşakları kabledecek hem eni emoţiyaları onnara baaşlayacȇk. Eni sanitar istemekleri giriştirildilär. Bu üzerä bir smenada 90 uşak olacȇk ileri sä bu sayı 150-ydi. dinnenmää isteyännerin sayısı büük. Kalan iki smenelara deyni dä listelär artık dolu, çizgiledi V.Dragoy: «Büün ilk smenä lagerä girer. Var umudumuz, ani hepsi islää geçecek, uşaklar dinnenceklär da sentäbrinin birindä ii emoţiyalarlan okula gideceklär. Umutlanȇrız, ani onnar lagerdä kendilerinä eni dost bulacȇklar».
Uşaklar sabaalen Kultura evi yapısının önündä toplandılar. Onnarı analar-bobaları geçirdilär. Uşaklar çizgiledilär, ani dalgalanȇrlar. Ama onnar inanȇrlar, ani lagerdä dinnenmäk zamanı şen hem faydalı geçecek.
«Biz lagerin koşullarını taa görmedik, amma var umudumuz, ani uşaamız orasını beenecek. En önemni, ki o kafadar kendisinä bulsun. O bizdä aktiv hem lafçı uşak. İsteerim taa cuvaplı, kendibaşına olsun».
«Benim uşaam ikincii keret “Olimpieţ” lagerinä gider. O orasını pek beener. Bana deyni önemni, ki o beensin, ona islää olsun. İlk keret açan gitti, beendi orasını da hep sorardı nezaman taa bir keret gidecek. O her yaz ikişär keret lagerä gider: erindeki “Olimpieţ” lagerinä hem Vadul liy Vodȇya. Ama erindeki lageri taa pek beener».
Uşaklar dalgalı. Onnar sevinrlär ani ilerdä onnarı eni tanışmaklar hem türlü emoţiyalar, meraklı kultura hem sport olayları beklerlär.
«Bu lageri seçtim çünkü orada pek şen vakıt geçer hem dä o en yakın bizä. Bän en çok yaradıcılık konkurslarını beenerim, açan kendindän ne sä düşünersin dä hepsinä gösterersin».
«Sefta lagerä gideerim. İstedim gitmää, çünkü orada türlü yarışmalar hem konkurslag geçirilerlär. Şindiya kadar sadecä gündüz lagerinä vardır gittiim».
«İkincii keret lagerä giderim. Giderim, öünkü hepsi benim dostlarım hem kumalarım orada olacȇklar. Pek saverim vakıt geçtiynä patretleri hem videoları siiretmää. Bizim “Olimpieţ” lagerimzii pek beenerim. Başka lagerlerä yoktur gittim, amma patretlerdä onnarı gördüm. Bana kalsa onnar hepsi benzeşerlär».
«Pek severim lagerä gitmää. Orada eni dost kendimä bulȇrım. Pek severim oyunnarı angılarını bizä deyni lagerdä geçirerlär. Bän geçän yıl da lagerä gittim, amma bu yıl enidän istedim Geçän yıl biraz zorcaydı, amma bu yıl bän şansora herbir işi bilerim hem bana taa kolay olacek. Annadım, ani eni dost edenmää pek islää bir iş».
«Bän 5 yıl sıravardımr Olimpieţta dinnendim, bu yıl 6-ci olȇr. Pes severim orasını. Raatlık hem gözäl bit atmosfera var orada. Eni dostları kendimä orada edenerim. Burada bän çok işlerä üürendim: kendim döşeklerimi toplȇȇrım, çin sabaaylem kalkȇrım».
Olimpieţ lagerindä 1 smenda dinnenmäk için 850 ley ödemää lääzım.
Avtorlar: O. Lodka, V.Çoban, operator: S. Georgiev, montaj: İ.Rezuneţ
Moldovanın hem Gagauziyanın en mekalı haberleri GRTnın Telegram kanalında!