Komratta geçti meraklı oluş, angısı Uşakları korumak gününä adalı. Geçirdi onu Avtonomiyada Halk advokatın ofisın temsilcilii.
Komradakı Dmitriy Kara –Çoban adına liţeyin birinci klasın üürencileri, haklarını oyun aşırı üürendilär.Yortu bir interaktiv formatta urok gibi geçti, neredä uşakların oldu kolaylıkları oyunnan bilää kendi hakları hem cгvaplıı için üürenmää .Annatmaa uşaklara oyun aşırı onnarın hakları için, böleliklän ta küçüklüktän bilsinnär, ani onnarın sesleri önemli hem lääzım işidilsin- halez bölä oluşun neeti açıkladı Komrat Halk Advokatı Ofisin başı Svetlana Mironova: «Halk advokatları herzaman raatsız olȇrlar , ki bizim uşaklarımız korkunçsuz yaşasınar, koruntu altında bulunsunnar, saalıklı kalsınnar , hakları bakılsınnar.O üzerä, ani yaklaşȇr iyün ayin 1-ri, Uşakları korumak günü, biz istedik geçirmää bölä yortuyu, ki onnar bilsinnär kendi hakları için Uşak hakların Konvenţiyasına görä. Onnar yapaceklar sınışları diil salt Konvenţiyaya görä, dıil salt sport yarışmakları, ama kabledäbileceklär bilgileri, angıları onnara bu yaşamakta lääzım olaceklar».
Olayın kurucuları savaştılar yapmaa ölä, ani bu yortu geçsin diil sade şenniktä hem şamatalıkta, ama fayda da olsun. Uşaklar komanda oyunnarına katıldılar, sınışları yaptılar, birerdä sevgili üüredicinin portredini resimnedilär. Neet, uşaklara haklar konusunda önemli bilgileri kolay bir formatta vermää.Uşakların hakları okulda üüretim proţesi gidärkän dayma er alȇr. Üüredicilerin laflarına görä bu yardım eder uşaklara kendilerini ta kaavi duymaa hem bilmää, ani onnar koruntu altında bulunȇrlar.
Tatyana Kiryakova, Komrat Dmitriy Kara –Çoban adına liţeyin 1 «V» klasın üüredicisi, nışannadı: «Büünkü yortuda pek aktual tema— uşaklar bilsinnär kendi haklarını.Bu temaya biz okulda da ön er vereriz. Büünkü gündä onnar bilerlär kendi haklarını,bilerlär kimä danışmaa eerlecim evdä varsaydı nesoysa problemalar, okulda ya da onun dışında».
Svetlana Kara, Komrat Dmitriy Kara –Çoban adına liţeyin 1 «A» klası üüredicisi, urguladı: «Bän sayȇrim, ani uşaklar lääzım bilsinnär, nicä kendi haklarını, ölä borçlarını da. Bir laflan taa ilk klasslardan biz üürederiz onnarı kendi haklarınnan bilä cüvaplıı için da bilmää».
Oluşun bitkisindä uşakları tatlılıklar beklärdilär.
Moldovanın hem Gagauziyanın en mekalı haberleri GRTnın Telegram kanalında!