Gagauziya resimcilär Asoţiaţiyası sergisini Коmratta geçirdi, bu yıl o 20-ci yıldönümünü nışannȇȇr. Gagauziya Halk ustaları günü resimcinin, sevenir susakları ustasının Pötr Vlahın duuma gününä baalı.
Gagauziya resimcilär Asoţiaţiya ȇkspoziţiyası Komradın merkez parkında erleşti. Onda Gagauziya, Moldovanın poyraz hem üülen tarafından ustalar pay aldılar. Asoţiaţiyanın öndercisi Nikolay Kroytor urguladı, ani kurum 20 yılın içindä halk zanaatların meydanı oldu.
«Sergi Halk ustaları günüä adalı hem onu gagauz resimcinin Pötr Vlahın duuma gününä adȇȇrız»,- Nikolay Kroytor urguladı.
Usta Valeriy Kilioglo deridän türlü giimneri diker, gergefleri onnara ellän yapȇr. Koyun derisindän büüklerä, küçüklerä keptarlar, kıvırcık kalpaklar, işlenilmiş derilär – usta işleri, angılarını usta profesional uurunda yapȇr, bunnan halkın kultura varlıını koruyarak. Ustanın laflarına görä, var olan incäzanaatın kıymeti milletçiliktä.
«Bizim dädularımız derileri sepelärdilär, onnardan bütün ayleyä ruba dikärdilär».
«Gagauziya kolegalarımızı geldik tutturmaa. Bendä kufnä avadannıkları hepsi odundan yapma. Butakım sergilerä lääzım katılalım, insan el işlerimizi görsün, bekim birkimsey dä ulaşacek da isteyecek üürenmää».
Hep bu gün Komradın Regional istoriya-dolay muzeyindä tombarlak masa Pötr Vlahın duuma gününä hem Gagauziya Ustaları gününä adalı geçti.
«Вu yıl ustalar Asoţiaţiyası 20 yılını kutlȇȇr, ona gagauz küülerin ustaları girdilär, onnun da ilk pay alanı resimci Vlah Pötr. Muzey fondunda ustanın dokumentleri, yazılı susakları, ȇkslibrisları büük bir kolekţiyayı kurȇrlar»,- Valentina Dermenci, Komradın Regional istoriya-dolay muzeyin başın bir vakıda işini yapan urguladı.
Usta Pötr Kapaklı Beşalmadan resimciya Vlah Pötrın hatırası için anmak-pano ȇskizini lazerlan yakmak tehnikasında hazırladı, angısını ustanın Pötr Vlahın evindä düşünerlär asmaa.
«Ȇskizin baş erindä Vlah Pötrın patredi iş uurunda. Masada kiyatlar, angılarınnan o işleer, yazılı susaklar»,- Pötr Kapaklı urguladı.
Buluşmanın pay alannarı iniţiativayı ustanın adını istoriyada şannamaa tutturdular.
Moldovanın hem Gagauziyanın en mekalı haberleri GRTnın Telegram kanalında!