Gagauz Yeri Üüretim bakannıı Ana dili yortusuna adalı kvest oyununu geçirdi. Avtonomiyanın ayırı üüretim kurumnarından 20 komanda katıldı.
Kvest meraklı marşrut yolu gibi kuruldu. 10 durmak eri vardı: “Bilersin mi sän yazıcıyı”, «Gagauzların millet giimneri», “Bilmeycä”, “Topla söleyişi”, “Topla Gagauziyanın anılmış erlerini”, “Duy, halk avasını!” , “Tarih sayfalarından”, “Pantomima”, “Ol dikat!”, “Kuran”. Herbir durmak erindä üürenicilär türlü meraklı, intelektual sınışlarını çözdülär. Dooru cuvaplar için bal kablettilär. Sonuçta en başarılı bölüklär belli edildilär.
I-ci er
G.Gaydarcı adına liţeyi;
II-ci er
S.Baranovskiy adına liţeyi;
Dm.Tanasoglu adına gimnaziyası;
III-cü er
Kongazçik küüyü gimnaziyası;
Dm.Çelengir adına liţeyi;
Kazayak küüyü gimnaziyası;
Dm.Karaçoban adına liţeyi.
I-ci, II-ci, III-cü erleri alan bölüklär Gagauz Yeri Üüretim bakannıın adından metinnikleri hem para ödüllerini kablettilär. Kalan katılannara baaşışlar verildilär. Üürenicilär açıkladılar, ani havezlän gagauz dilinä adalı olaylara katılȇrlar.
«Severim ana dilimi. Geçennerdä Ana dilimizä adalı konkursta birinci eri kazandım. Sevindim. Ama bu sadece benim başarım diil. Bana yardımcı oldular ayläm hem üüredicim. Saa olsunnar».
Üüürenicilär Kuran da oynamaa üürendilär. Bu dedelerimizin oyunu. Halk ustası P.Kapaklı hem M.Maruneviç adına Bilim merkezin uzmannarı üürenicilerä kuralları annattılar. Uşaklar havezlän biri-birinnän yarıştılar.
“Bän mutlak deneyecäm okulda akrannarımnan Kuran oynamaa. Bu meraklı hem intelektual oyun”.
Ana dili yortusuna adalı kvest oyunu gösterdi, ani evlad boyları gagauz dilinä saygıylan danışȇrlar hem havezlän onu akrannarın arasında kullanabilerlär.
Moldovanın hem Gagauziyanın en mekalı haberleri GRTnın Telegram kanalında!