Bitki yıl üürenicilär ekzamen programmanın modellerinä görä denemäk testları geçerlär. O onnarın hazırlıını gelän ekzamennerä belli edecek.
Denemäk testlerini geçmäk süresindä gimnaziya hem liţey klaslarını başarannarına verilerlär ölä sınışlar, angıları ekzamennerdä pek benzeerlär. Üüredicilär uşaklarları hazırlȇȇrlar, konsultaţiyaları geçirerlär, yapılmış sınışlara analiz yapȇrlar. Denemäk testlerin çıkışları belli ederlär üürenicilerin yufka taraflarını hem üüredicilerä bu uurda işlemää kolaylık vererlär, nışannadı Gagauziya üüretmäk bakanı Nataliya Kristeva: «Denemäk testlerini geçirdilär ölä koşullarda, angıları ekzaminnerä pek benzeerlär. Yazılmış işlär dä ayırı kurulan komissiyalan kontrol edildilär. Uşaklar sansı ekzamindä bulundular».
Testlerin kontrol etmenin sonunda üüredicilär analiz yaptılar hepsi testlerin materiallarına — çekederäk üürenmäk programanın uydurmasına, zoorluk uuruna hem başararakk notaların kriteriyalarınınnan. Onnar hepsi esaba alınacek ekzamen testlerini kurmak vakıdında , açıkladı Nataliya Kristeva: «Eer lafedärsäk rumun dili uurunda çıkışlar için, onnarda 1421 9-cu klaslar üürenicisi pay aldılar. Çıkışlar matematikadan taa islää, amma işlemää taa var neylän . 60% verilän sınışları gerçekleyäbildilär. 20 üürenmäk kurumunda çıkışlar ii uurda bulunȇrlar, ama üürenicilerin 40% sınışları yapamadılar. Bu çıkışlar pek önemni hem üürenmäk kurumnarına var neylän işlemää. En zor temalara analiz yapıldı hem metodika teklifleri üüüredicilerä deyni işledildilär».
Ayırı dikkatlık 9-cu klasta üürenän uşaklara veriler, angıları risk gruppasında bulunȇrlar. Onnara deyni taa kaavi hazırlanmak yapılȇr. Bu iş doorudulu ona, ani uşakların bilgileri taa ii urda bulunsunnar hem ii çıkışları testlerin sonunda göstersinnär.
«Bu programa MD üüretmäk ministerliin iniţiativosuna görä gerçeklener, ki yufka bilgileri üürenicileri matematika hem rumun dili disţiplinalarında desteklemää. Bu programma kaaplȇȇr 700 üüreniciyi rumun dilindä hem 300 üüreniciyi matematikada. Bütün gagauziyada bölä merkezlär kuruldular, 56 grupa rumun dili disţiplinası için, 25 grupa matematika için. Uşaklar burayı ver nicä gelsinnär dinnenmäk günnerindä yılın sonunadan üüredicilärlän ekzaminnerä hazırlansınnar»,- açıkladı Nataliya Kristeva.
Hep bu vakıt geçirelecek denemäk testleri 12-ci klasların üürenicilerinä deyni dä, ki görmää, angı uurda bulunȇr onnarın bilgileri.
«10, 11, 12 -ci klasların üürenicileri kendileri seçerlär liţey yolunu hem bilerlär ne onnarı 12 klasın sonunda bekleer. Onuştan yıl-yıldan onnarın çıkışları taa ii uura kalkȇrlar. Yıl-yıldan uşakların taa çoyu ekzaminneri başarılı vererlär hem her yıl 9 hem 10 notalara ekzaminneri verän üürenicilerin sayısı zeedelener»,- açıkladı Nataliya Kristeva.
Avtonomiyanın birkaç 12-ci klasta üürennerinä deyni denemäk testlärdän kaarä, mardın ikinci payında laborotor işi da geçirildi, ki bilgileri ayırı predmetlerdän taa deerindän belli etmää.
«Fevral ayında şkolaların kimisindä laborator testlemesi geçirildi . Onun needi 12-ci klaslarda üürenicilerin bilgi uurlarını ekzamin predmetleri uurunda kontrol etmää. Bu testlemektä Gagauziyanın okullarından 300 üürenici katıldılar. Testlär geçirildilär ölä predmetlerdä nicä: engli̇s di̇li̇, rus di̇li̇, gagauz di̇li̇, bolgar di̇li̇, geografi̇ya, türk di̇li̇ hem sport di̇sţi̇pli̇nasında»,- açıkladı Nataliya Kristeva.
Sınışlar türlü uurlarda verildilär, notalamak kriteriyaları da annaşılıydilar. Üürenicilär annadılar nekadar bal veriler herdir iş için hem ne lääzım yapmaa ekzameni islää yazmaa deyni. Sistema annaşılı — kalȇr sade deerindän hazırlanmaa ekzaminnerä, çizgeledi Nataliya Kristeva: «Benim dileklerim- raat ekzaminnerä gelmää, bütün kuvedini hem bilgilerini göstermää hem annamaa, ani yaşamakta var ölä etaplar, angılarını geeri çevirmää yok nicä. Şkola bir sıra yaşamakta olȇr. Var nicä birkaç sıra universitet başarmaa, amma şkola sade bir sıra olȇr. Onuştan kendi ilk bilgi dokumentini lääzım ii urda kablrtmää. İi uurda lääzım olsun bakalavr diplomu da , angısı verecek istedii yolu yaşamakta ayırmaa ».
Bitki yıl okulda bulunan üürenicilerä nasaat ediler verilän materialları aktiv kullanmaa. Geçän yılların denemäk testleri Devlet agenstvosunun kurrikulum hem notalamak saytında bulunȇrlar hem onnarı örnek olarak kullanmaa yakışȇr.
Avtor: A. Çebanova, operator: V. Kıssa, montaj: A. Topal
Moldovanın hem Gagauziyanın en mekalı haberleri GRTnın Telegram kanalında!