Büük Vatan Cenk vakıdında Komradın kurtarılmasının 80- ci yıldönümünä adalı yarışmak avtonomiyanın şkolaların üürenicilerin arasında geçti. Proektin süresindä onnar topladılar materialları o istoriya sayfaları için, angılarını gençlerin bakışlarına görä hepsi lääzım tutsunnar akıllarında. Proektin en ii pay alannarını notaladılar regionun kuvetleri.
Gagauziya Başkanı Evgeniya Guţul üüsek notaladı üürenicilerin başarlarını o üzerä, ani istoriyayı lääzım aklıllarında tutsunnar.
«Gagauziyanın uşaklar en gözäl, en akıllı . Onnar bilerlär kendi istoriyasını»,- Gagauziya Başkanı Evgeniya Guţul nışannadı .
Üüretmäk bakanı Natalya Kristeva şükür etti üürenicileri hem üüredicileri, angıları pay aldılar yarışmakta. En üüsek başarıları gösterdilär Çadır- Lunga Guboglo adına liţeyin üürenicileri hem Kirsovo küüyün gimnaziyasının üürenicileri.
«Onnar annattılar o insannar için, angıları pay aldılar o olaylarda. Bu onnarın aaraştırmak işi, onnar dokumentlärlän işledilär. Bu saygılı bir iş. Biz herzaman deriz, ani bizim en önemli neetimiz terbietmää ölä uşakları, ki onnar ana tarafını saysınnar, hodullansınnar onunnan. Bilmeyeräk istoriyayı, yok nicä bu duyguları terbietmää»,- dedi Kristeva.
Moldovanın Rus toplumun başı Valeriy Klimenko pay aldı olayda. O çizgiledi, ani proekttä pay aldılar üürenicilär türlü devletlerdän. Moldovadan ona katıldılar 700 zeedä uşak.
«Biz lääzım tutalım akıllarımızda Moldovanın hem Gagauziyanın kötü istoriya sayfalarını hem uşaklara da lääzım annatmaa bu istoriya sayfaları için»,- nışannadı Klimenko.
Üürenicilär paylaştılar, nesoy proektleri onnar yaptılar hem nesoy duygular var.
«Bu proektin süresindä biz annadık, ani lääzım bizim istoriyamızı bilelim hem onu taa çok bilsinnär hepsi evlad boyları da».
«Şükür ederiz, bu proekt bizä deyni meraklı oldu».
Büük zaametlär için uşakların terbietmesindä üüredicilär kablettilär kiyatları, angılarında gösterili Moldovanın hepsi anmak erleri baalı Dünnä cenginnän.