Gagauz Erindä «Üüretim için» kanon proektini baktılar. Açık seslemekleri GHT geçirdi. Deputatlar, Üüretim bakannıı uzmannarı, liţeylerin hem gimnaziyaların öndercileri hem üüredicileri, cümnä temsilcileri katıldılar. Herbiri kendi bakışını açıkldı.
Açık seslemeklerin süresindä pay alannar kendi bakışlarını açıkladılar. İlk erä dil soruşları koyuldular. Üüredicilär çızgıledilär, ani gagauz dilinin ilerlemesi için çok yapıldı artık, ama taa var ne yapmaa, ki üürenicilär ana dillerini taa üüsek uurda bilsinnär hem onu bol-bol kullanabilsinnär.
«Bizim avtonomiyamız var. Kalan dillerä baskı hiç birzaman yapmadık. Uşaklarımız küçük yaştan multilingval ortamında büüyerlär. Okulda da 4 dül üürenerlär»,- nışannadı Svetlana Düvenji, deputat.
«Üüretim için» kanon proektindä yazılı, ani gagauz dilini hepsi üürenicilär üürensinnär lääzım. Onnar da kim rumın dilindä üürener.
«Gagauz dilini lääzım üürensinnär o liţeylerdä dä neredä üüretmäk proţesi rumın dilindä geçer. İslää bir örnek — S.Demirel adına liţeyi. Burda Gagauz halkın istoriyası, kulturası hem adetleri predmeti var. Bileriz, ani burada üüretmäk proţesi rumın, englez hem türk dillerindä geçer»,- sayȇr Evgeniya Andrieş, Üüretim bakannıın baş uzmanı.
İnklüziv üüretmäk sisteması için dä laf gitti. Üüüredicilär çizgiledilär, ani okulların zeedesindä resurs merkezleri var. Ama uzmananr lääzım olsunnar — psihologlar, logopedlar hem başkaları. Bu üzerä para da taa zeedä verilsin lääzım. Hep ölä laf gitti üüredici zanaatın prestijı için hem kolaylıklar için, angıları yardım edeceklär genç uzmannarı şkolada işemeyä havezlendirmää. Söledilär şkola dolayları için dä. Ani bu kural mutlak kullanılsın lääzım. Kiyatta kalmasın. Da üürenicilär birinci klasa kendi dolaylarında bulunan okullara gitsinnär.
«Yazık, ama pek zor birinci klası toplȇrım. Kalan okullarda sa iki ya 3 klas var»,- nışannadı Olga Tabakar, S.Demiretl adına gimnaziya-uşak başçası başı.
Gagauz Eri Üüretim bakannıın başı N.Kristeva söledi, ani bu kanon proekti üüretim sistemasını taa islää yapmaa kolaylıı verecek. Bundan kaarä bu dokument devlet kanonnarını esaba alȇr da türlü soruşları çözer.
«Bu kanon proekti tamannȇȇr milli kanonumuzu üüretim uuruda. Bu pek önemni. Biz aykırı gitmeeriz devlet kanonnnarına. Ama hep ölä biz regionumuzun haklarını koruyȇrız hem kaavilederiz onnarı»,- nışannadı Kristeva.
«Üüretim için» kanon proektini notaladı deputat GHT Üüretim soruşları komissiyasının başı D.Manastırlı.
«Hepsi profil komisiyaları hem bakannıklar üüsek uurda notaladılar bu kanon proektini»,- açıkladı Manastırlı.
«Üüretim için» kanon proektini taa bir keret GHT Üüüretim soruşları komissiyasının azaları bakacȇklar. Hepsi takazalar hem tekliflär esaba alınacȇklar — çizgiledi D.Manastırlı. Bundan sora bu dokumenti ilk okumakta GHT oturuşunda bakacȇklar.
Moldovanın hem Gagauziyanın en mekalı haberleri GRTnın Telegram kanalında!