Valkaneş dolayında gumanitar yardımını kablettilär yaşayannar, kim zor durumda bulunêr. İş vizitinnän burada bulundu Türkiya devletindän delegaţiya.
Valkaneş dolayın administraţiyasında geçti buluşmak, angısında pay aldılar Türkiye devletin Büük Elçisi Moldovada Uygar Mustafa Sertel, Türkiye Genel Konsulu Eda Güç, hep ölä dä TİKA agentliin koordinatoru Murat Zelan. Yardımnamak akţiyanın sınırlarında, angısı baalı Ramazan yortusuna, Türkiye halkından imek malları verildilär insannara. Yardımı pay edeceklär primariyalarda dolayın herbir küüyünä hem kasabasına. Türkiye delegaţiya azaları nışannadılar, ani bölä yardım insannar için önemni, ayırı kim bulunêr zor durumda. Buluşmanın pay alannarına danıştı Türkiye devletin Büük Elçisi Moldovada Mustafa Uygar Sertel: «Bu önemni Ramazan ayında biz geldik avtonomiyaya bizim gagauz kardaşlarımıza, ki barabar yardım etmää onnara, kim zor durumda bulunȇr. Başka yıllarda da biz genä bölä gelärdik yardımnan, şindi genä burada buluştuk. Sevineriz bütün candan, ani var kolaylık bölä yardımı vermää insannara bu özel vakıtta».
Bu akţiyada yardımcı oldu TİKA barabar çalışmak uurunda agentlii. Çok yıl sıravardır onnar soţial hem infrastruktura proektlerini regionda yardım ederlär giriştirmää.
Murat Zelan, TİKA barabar çalışmak uurunda agentlii koordinatoru: «Bu yıl «Bizim soframız – cannardan» akţiyanın sloganı. Onun baş neeti — paylaşmaa sevinmeliklän hem sıcaklıklan kimä bu gerçektän lääzım. Bizim için bu pek önemni — biz sevineriz, ani Gagauziya yaşayannarı da katılı bu önemni olaya».
Bu yardımın önemnii için gagauz halkına söledi Valkaneş dolay administraţiya başı Ivan Kreţu. O şükür etti Türkiye devletini bu akţiya için.
«Bizim dostlar bizi brakmêȇrlar yalnız, onnar bu yortuyu isteerlär bizimnän barabar paylaşsınnar da bizim da insannar duysunnar bu yortuyu, neçinki biz bileriz, ani bizim var büük dostlarımız — Türkiye, ani bizi hiç brakmêȇr, herbir zorumuzda onnar gelerlär yardıma. Büün da onnar geldilär, ani biz onnarlan birlik, onnarlan bu yortuyu geçirelim da bizim insannar da sevinsinnär»,- Ivan Kreţu şükür etti.
İmek mallarını verdilär herbir primara, onnar kendi yaşamak erlerindä daadaceklar zor durumda bulunan insannara. Yardım için şükür laflarını söledi Tülüküü primarı Natalya Popova: «Bütün Gagauziya milletin adından gerçektän, Türkiye Vumhuryetinä teşekkür etmää isteeriz. İi ,ki varsınız, Ramazan bayramı kutluca olsun, herkezinä teşekkür ederim».
Yardımnamak akţiyası her yıl geçer Ramazan ayında hem oldu bir adet, angısı gösterer barabar saygıyı hem halkların arasında dost baalantıların kaavilenmesini.
Moldovanın hem Gagauziyanın en mekalı haberleri GRTnın Telegram kanalında!