Valkaneş kasabasında geçti türkücünün Lüdmila Bazacının ilk konţeri. Muzikalı avşam topladı parkta kasaba yaşayannarını hem musaafirleri.
Lüdmila Bazacı için Valkaneştä konţert onemni oldu, çünkü ilk keret o kendi programasını burada istedi geçirmää. Bu kasabada o duudu hem büüdü, yaptı ilk adımnarını muzikada, ama büün onun yaratmalarını bilerlär diil sade Valkaneştä.
«Bizim küüdän o, biz barabar şkolada üürendik. Hepsi islää — gözäl».
«Türkülerini sesleeriz herzaman, herbir konţertini bakȇrız».
«Çoktan, o küçüktän taa nesaydı düşüner, nesaydı yazȇr, toplȇȇr onnarı, gecä kalkȇr, genä yazȇr, sora toplȇȇr onnarı hepsini bireri».
Valkaneş yaşayannarın çoyu Lüdmilanın yaradıcılık uurunu bilerlär diil bir yıl. Bu konţerttä siiredicilär işittilär sevdii türkülerini, avtorun yaratmalarını hem eni çalışmakları. «Ayırı bir eri kaplêêr o, ani ilk konţert maasuz Valkaneştä geçer», — dedi Lüdmila Bazacı.
LÜDMİLA BAZACI türkücü
«Çok sevindim, geldim kendi kasabama, benim kendi duuma erimä. Burada çok ii, çok yalpak insannar, angıları — bän bilerim, ani beni büün bekleerlär, çoyu yazdı bana. Çok sevindirer beni, ani bän büün kendi topraamda, kendi erimdä verecäm kendi ilk konţertimi, sora olacek taa başka erlerdä, ama büün istedim sevindirmää kendi insannarımı kendi topraamda».
Destek olmaa Lüdmilaya bu önemni avşamda geldilär onun kollegaları. Maasuz musaafirlär oldular gruppa «TOZI», Arina Bratan, İnna Gulvanskaya hem «Gagauzlar» oyun hem türkü ansamblisi.
«TOZİ»
«Biz Lüdmilaylan çoktan barabar işleeriz. Biz yazdık çok türkü. ВЫРЕЗАТЬ Lüdmila bilmeerim nesoy bir talantlı insan, biz Allaha dua ederizÜ ani o bizdä var, çünkü bizä onunnan çok kolay işlemää. O bizi annȇȇr ilk notadan. Biz ona sade söleeriz , Lüdmila, burada nesoy olacek. O bizi hemen annȇȇr, hemen yazȇr bizä gözäl türküleri».
«Bizim var kendi stilimiz, diil hepsi annȇȇr bizim stilimizi. Biz isteeriz şen olsun türkü, herbir laf bizä çok önemni. Lüdmila bizim için çok keret çevirdi, diiştirdi — türküyü Kalbimi o çevirdi bizä, var lafları, neredä biz bulamaazdık — o türkülerdä dä, angılarını o yazmadı bizä, ama hep onu aarardık, sorardık».
İNNA GULVANSKAYA türkücü Ukrainadan
«İnsan olarak hem kadın olarak, çok cana yakın, ama muzika konusunda çok gözäl parçalar yaratȇr, memleketini da çok sever,patriot bir kadın deyabilirim. Bizim arkadaşlıımız çok yakın, çünkü bän da gagauz dilindä çok parça yazȇrım, şiir yazȇrım. Her konuda , herbir ülkedä olarak herzaman deerim, ani bän gagauzkayım».
ARİNA BRATAN türkücü
«Bän çoktan Lüdmila Valeryevnanın yaratmalarını severim, ama hiç yoktur düşündüüm, ani o benim üüredicim olacek. O pek açık ürekli, cana yakın bir insan. Biler nesoy destek olmaa, pek severim onunnan duetta çalmaa».
Lüdmila Bazacı için bu yaradıcılık avşamı diil sade ilk konţert oldu, ama aslıya çıkardı onun düş gütmesini da — baaşlamaa muzikayı kendi kasabasına hem paylaştırmaa bu vakıdı onnarlan, kim biler onun yaratmalarını taa çeketmedän.