Venoklar, angıları hazırlanȇrlar plastiktän hem zor çürüyän materiallardan, kötü belie derlär toprakta. Bu problema için şindän diil bir sıra söleerlär ekologlar. Moldova devletin tabiat ministerliinä etişti petiţiya, angısı imzalı 50 ȇkolog aktivistlerinnän hem kuruluşlarlan, yalvarmaklan durgutmaa gömmäk venokların satın alınmlasını. İniţiatorlar nasaat ederlär kabletmää kanon ölçülerini, angıları bütündän zapedeceklär venokları.
Komrat Komunal çorbacılıın başı İvan Karaman nışannadı, ani venoklardan, angıları hazırlanȇrlar plastiklerdän hem tellerdän, büük problemalar peydalanȇrlar, ki onnarı yoketmää. Nicä çizgiledi İvan Karaman, zamandaşta yok ȇffektiv metodlar venokların toplamaları için.
«Venokları hazırlȇȇrlar plastiktän, elbetki, onnar da nicä plastik şişeleri getirerlär kötülük tabiata. Yoketmää deyni bu plastii, bizdä Moldovada yok kolaylık. Bezbelli, lääzım zapetsinnär getirmää çiçekleri mezarlıklara. Biz toplȇȇrız onnarı, ama onnarda hep o plastik. İçindä tel var, onnarı lääzım taa ayırmaa da»,- çizgiledi İvan Karaman.
Gagauziya yaşayannarı açıkladılar kendi bakışlarını ȇkologiya ministerliin iniţiativası için, angısı doorudulu plastik venokların zap edilmeleri için mezarlıklarda. Çoyu onnardan sayȇrlar, ani mezarlaa taa islä getirmää taazä çiçekleri, neçinki onnar ȇkologiyaya zarar getirmeerlär.
«Tazä çiçeklär hızlı ölerlär, bunnar sa nesoysa , ama gözellederlär. Ama lääzım yapma hepsini, ki soluk taa pak olsun, hem düşünmää saalık için, var nasıl diiştirmää tazä çiçeklerä».
«Bän isteerim, ki benim kocamda hem ana — bobada olsun gözäl. Sade bir kruça olarsaydı, ozaman diil ii».
«Plastiktän getirmeerim. Bän getirerim sade onu, ne aulun içindä büüyer».
«Getirmeriz, sade tazä getireriz, para başkaları için yok».
«Nicä mezara çiçeksiz gitmää? Kimdä var tazä, kimin var kolaylıı sade plastikalı. Burada şindän sora, herbiri kararlȇȇr».
«Hep okadar çiçekleri lääzım getirmää.Nicä mezara çiçeksiz gitmää? Venok, venok gibi, çiçeklär sa lääzım olsunnar».
Ȇkologiya ministerlindä sayȇrlar, ani o üzerä, ani yok efektiv metotları kullanmak için gübürü, bölä venoklarıyakȇrlar kontrolsuz. Yada çürerlär onnarlan yıl, angıları getirerlär ekologiyaya zarar.
Moldovanın hem Gagauziyanın en mekalı haberleri GRTnın Telegram kanalında!