Moldovanın okullarında eni üürenmäk yılından mobil telefonnarın kullanmasında eni kuralları plana koyulu giriştirmää. Üüretim ministrusu Dan Perçun haberledi, ani heptän brakmama telefonnarın kullanmasını okulda olmayacȇk, ama işlettirlenecek reglament mobil tertiplerin kullanmasında.
2024-cü yılın sentäbir ayından Moldovanın okullarında var nasıl giriştirlensinnär kurallar mobil telefonnarın kullanmasında. Üüretim ministrusu Dan Perçun haberledi, ani heptän yasak etmeceklär telefonnarın kullanmasını, ama işlettirlenecek reglament mobil tertiplerin kullanmasında.
«Biz isteeriz kontrol etmää onnarın kullanmasını, ki açıktan belli olsunnar durumnar, açan var nicä, yada açan yok nicä mobil telefonnarı kullanmaa» ,- Moldovanın üüretim ministrusu Dan Perçun söledi.
Koyulu plana, ani reglament belli edecek durumnarı açan telefonnarı var nasıl kullanmaa hem da onnarı kim cuvap edecek tertiplär için, angılarını bir vakıda üürenicilerdän alaceklar.
«Moldovada var okullar, angıları kendibaşına telefonnarın kullanmasını sınırlȇȇrlar. Onnar türlü metodları bunun için kullanarkan türlü problermalarlan karşı gelerlär. Bizdä şansora var praktika bu soruşta da dünnäarası uurunda bölä ölçülär taa sorumnu olȇrlar»,- ekledi Dan Perçun.
Gagauziyanın yaşayannarı kendi bakışlarını açıkladılar bu iniţiativaya.
«Ne var nicä sölemää bu iş için. Telefon okulda diil lääzım olsun, neçin ki uşaklar aldanerlar da olmȇȇrlar açıkgöz derslerdä. Er bizim kuvetlär düşüneceydilär telefonnarı,nicä bir üüretmäk metodunu kullanmaa,ki o yardımcı olsun uşaklara bilgilerin kabletmesindä, ozaman var nicä onnar okulda olsunnar. Ama nicä şindi onnarı kullanȇrlar diil lääzım olsunnar. Heptän brakmama telefonnarı kullanmaa yok nıcä hem diil lääzm da, ama er ne sä meraklı olarsaydı,ne faydalı uşaklar için olacek ozaman var nicä».
«Bän sanȇrım, bu normal olacek. Uşaklarımız lääzım üürensinnär, ama diil telefonnarda okulda otursunnar».
«Telefon işlesin lääzım. Bekim uşaa sıra gelecek telefon açmaa anasına- bobasına. Problemaları çözmäk için. Telefonnarı diil lääzım yasak etmää okullarda. Bölä benim bakışım».