Dmitriy Mavrodi adına liţeyinda Kasım yortusuna karşı geçti yardım sergisi. Paralar gideceklär aylelerä, angılarına o pek lääzm. Akţiyaya 400 uşak katıldı.
Liţeyin üürenicileri hazırladılar yardım akţiyasını, angısının neeti ii işlerin yapılması hem da yardımın verilmesi onnara, kimä o lääzım. Uşaklar pek aktiv katıldılar paraların toplamasına uşaklar için zor durumda bulunan aylelerdän. «Kasım» yortusuna karşı barabar analarlan- bobalarlan uşaklar hazırlardılar türlü tatlılıkları, angılarını güz sergisindä türlü paalara görä vardı nicä satmaa kendi dostlarına, üüredicilerä, analara- bobalara.
«Dün biz mamuylan kruasan pişirdik. Bän isteerim vermää sizä bir kruasan. Onun paası — 2 ley».
«Bän yardım ettim mamuma hem kızkardasıma».
«Hepsi tatlılıklar».
«Bilä uşaklarlan yaptık. Çok gözäl bir neet. Paralar, angıları toplanaceklar yarmarkada, gideceklär fukarä aylelerä».
«Bölä yortularda uşaklar annȇȇrlar, ani lääzım birliktä olmaa.Hepsinä lääzım yardım etmä da olma dayak».
Taa ileri bölä güz sergileri sade başlankı klasların üürenicileri için geçirilärdilär. Bıldır hepsi toplanmış paralar verildilär bir ayleya, ki uşaklara kış rubalar alınsınnar. Bu yıl istedik taa çok üürenici katılsın, liţey başı yardımcısı Dmitriy Guç söleer: «Bu yortu islää bir yortu. Uşaklar analarlan — bobalarlan bilä hazırlanȇrlar».
«Pek büük havezlän bizim uşaklar hazırlandılar bu yortuya hem çok sevineriz, ani diil sade uşaklar ama onnarın anaları da bobaları da hazırlanȇrlar.Çok türlü işleri hazırlamışlar, imeklär, kimi rubaları da hazırlanmışlar. Biz bu işi barabar yaptık, ki insannara bununnan yardım etmää»,- nışannadı Vera Guç, üüredici.
Büük havezlän uşaklar pişirärdilär tatlılıkları hem da satardılar onnarı okulda yardım sergisindä. Hepsi toplanmış paraları doorudaceklar soţial yardımına, ne verdi kolaylık uşaklar duysunnar kendilerini bir büük iiliin payınnan. Bundan kaarä onnar üürendilär konuşmaa hem insanın kahırını annamaa, söledi liţey başı.
«Her bir klas 1-2-3 koydu kendi sofrasını da satȇrlar, ne hazırladılar analarlan bobalarlan. Onnar tatlılıkları da yaptılar. Diil pek paalı — 1 leydän — 5 leya kadar. O paraylan, angısı toplanacek, biz yardım edecez onnara, kimä zor» ,- nışannadı liţeyin başı Maksim Bolgar.
Akţiyanın pay alannarı nışannadılar, ani olay — o bir kolaylık yardım etmää başkalarına. Onnarın bakışlarına görä — bu bir ders hepsinä, ani diil büük kuvedin yardımınnan var nasıl dünneyi taa ii hem güneşli yapmaa.