Komrat «Piligrimı» uşak-gençlik akıntısı hem Kultura evin izmetçileri hazırladılar yardımcı sergiyi hem konţerdi Komradın yaşayanına, angısı güreşer kötü hastalıklan. Bir tarafta kalmayan insannar satın alardılar uşaklarlan yapılmış ellän işleri.
«Piligrimı» akıntısı başı Üliya İvarlak kararladı geçirmää sıradakı yardımcı akţiyasını, ki yardım etmää Komrat kasabasının yaşayanına, angısına lääzım yardım ilaçlanmaa deyni.
«Biz bizim uşaklarlan kararladık almaa, ne siz görersiniz da yapmaa kendi ellerinnän bu işleri. Bu işä eklendilär nicä analar-bobalar, ölä dä başka insannar. Onun için söleerim çok saaol, ani oldu ölä kolaylık, da kimisi kalmadı bir tarafta»,- Üliya İvarlak söledi.
Sergidä vardı kolaylık satın almaa yapılı biserdän resimneri , gipstan işleri , blezikleri, oyuncukları hem taftadan işleri. Uşaklar da vardı nasıl atlasınnar batutta. Hepsi bu işleri kendi ellerinnän yaptılar «Piligrimı» akıntısının terbiedenneri, yardım ettilär başka insannar da. Nicä urguladılar uşaklar, onnar kendi terbiedicisinnän hazırladılar meraklı işleri bir ayın içindä, ki yardım etmää bu çocaa onun belasında.
«Biz işledik bir ay bu işleri yapmaa deyni, da her gün geldik, ki birerdä bu işleri yapmaa»
«Biz hazırlandık bu akţiıyaya bir ay, da bu vakıdın içindä biz toplanardık, yaptık bu işleri».
Kasabanın yaşayannarı satın alardılar yapılmış ellän işleri yada koyardılar kendi kolaylıklarına görä finans yardımını. İnsannarın laflarına görä, erlem kiminsä evinä geldi belä, lääzım toplanmaa da yardım etmää, erlem ayledä yoksa kolaylık yalnız bunu yapmaa.
«Biz toplandık, insannar , ki yardım etmää, bu pek ii . Neçinki bizsiz, başka insannarsız, insan yoknicä gitsin ileri, nicä hepsi gezsin sokaklarda, sevinsin, nizä biz sevineriz güneşä».
«Bän sayȇrım, ani hazırladılar en ii, ne yakışardı yapmaa . Da pek önemni toplanmaa, birleşmää, da damna- damna yardım etmää».
«Bän söleyecäm ölä, ani aalemin uşakları yok, onun için lääzım hepsi eklensinnär da yardım etsin, kim neylän yakışȇr».
«Çok saaol hazırlayıcılara, angıları geçirdilär bu olayı, da onnar tutturȇrlar bu ayleyı, angısında var bela, da bän düşünerim, erlem herbiri koyacek kendi payını, kendi canını , ozaman bizi bekleer iilik».
Kultura evin zaametçileri geçirdilär yardımcı konţertini, neredä pay aldılar artistlär hem oyun kolektivleri. Siiredicilerin vardı kolaylıkları katılmaa akţiyaya da yardım etmää, koyup kendi kuvedinä görä para.
«Bu her keret önemniydi zor durumda, neçinki ayleya zor bulmaa bukadar finans, ilaçlanmaa deyni. Da biz nicä cümnä lääzım yardım edelim, üüredelim gençleri».
«Var ölä laf dost belii ediler kahırda. Da te bu — o vakıt, açan biz sayarak kendimizi bir halk, lääzım toplanalım da yardım edelim, çünkü kimisai bilmeer, nezaman onda yada başkasında olacek bela».
Akţiyanın süresindä, angısı geçti İki günün içindä, insannar kalmadılar bir tarafta, da yardım ettilär toplamaa yakın 15 bin ley, angılarını vereceklär Komrat kasabanın yaşayanın aylesinä, ki ilaçlansın.
Moldovanın hem Gagauziyanın en mekalı haberleri GRTnın Telegram kanalında!