Yardımcılık sergisindä, angısını G. Gaydarji liţeyindä onun üürenicileri geçirdilär, toplanıldı 36 bin ley. Onnarı verdilär uşaklara, angılarına lääzım paalı ilaçlanmak, nışannadı başlankı klassların üüredicisi Valentina Terzi. Sergi geçiriler bu üüretmäk kurumunda üçüncü keret. Bu sefer toplanıldı taa çok para, nekadar başka yıllar. Onnarı verdilär hasta uşakların analarına-bobalarına, nışannadı Valentina Terzi.
«Serginin çıkışları bizi devindirdilär. Biz topladık paraları. Hiç beklämedik, ani okadar toplanacek, 36 bin leydän taa zeedä. Bu paralar uşakların bütünnä ilaçlanmasına etmeyecek, ama hep okadar yardım edecek. Biz düün başlankı klassların üüredicilerin komisiyasınnan hem üürenmäk kurumun başınnan verdik konverdi paraylan analara — bobalara. Hem hep ölä orada vardı baaşışlar uşaklara deyni o analardan-bobalardan, angıları kalmadılar bir tarafta insannarın kahırından. Başlankı klassların üüredicilerin komisiyası başı Valentina Terzi danıştı şükür etmäk laflarınnan yardımcı akţiyasının kurucularına»,- söledi Valentina.
Valentina Terzi nışannadı. ani bakmayarak ona, ani var çok yardımnamak fondları, hep okadar lääzım bölä yardımcı sergileri geçirmää okullarda, ki üüretmää uşakları iilik yapmaa.
«Moldovada var çok fond, angıları yardım ederlär hasta insannara. Çoyu işider bu fondlar için , amma aktiv pay almȇȇrlar bölä yardımcı akţiyalarında. Bölä akţiyalar vererlär kolaylık herbir uşaa iilik yapmaa, hem yardım etmää te onnara, kimä lääzım bizim yardımımız»,- ekledi Terzi.
Yardımcı akţiya G. Gaydarji adına liţeyindä oldu adet gibi, angısını üüredicilär hem üürenicilär ilerledeceklär gelän yıllarda da.