Tülüküüdä geçti yortu, angısı baalıydı aylä gününä. Küüyün meydanında toplandılar hem büüklär, hem küçüklär.
En küçük yaşayannar için batutlar, popkorn, tatlı vata hazırlandı. Hep ölä dä şen animatorlar çok türlü oyunnarı hrm konkursları geçirdilär. Yaşayannar kendi duygularını açıkladılar.
«Sayȇrım, ani taa sık var nicä yapmaa bölä yortuları uşaklara, neçinki hepsindä yok kolaylık gitmää Valkaneşa da geçirmää vakıdı uşaklarlan. Pek islää, ani uşaklar türlü yaşta burada oynêêrlar».
«Elbetki, yortu pek islää. Saa olsunnar, ani hepsi parasız, uşaklar burada ayläylän dinnenerlar, neçinki, açan 50 ley 10 minut için verersin, o pek paalı, saa olun».
«Pek sevinerlär uşaklar bu yortuya».
Hepsi oyunnar, tatlılıklar parasızdı, bu pek önemni, nışannadı yaşayannar. Dış ilişkileri bakannıı başı yardımcısı Üriy Kuzneţov urguladı, ani bölä yortuları pek önemni geçirmää.
«Biz bütün komandamızlan sayȇrız, ani aylä zenginniklerini korumaa pek önemni»,- Üriy Kuzneţov urguladı.
Bölä yortular diil sade birleştirerlär ayleleri, ama yaşayannarın arasında da baalantıları taa ii yapêrlar, dedi küü nasaatı başı Anna Mınzat: «Bizä bölä yortular etmeerlär, taa sık olsa geçirilsinnär. Bu büük sevinmelik uşaklar için hem analar-bobalar için dä. Hepsindä yok kolaylık götürmää uşakları kasabalara. Bu pek paalı işlär».
Hepsi bu olaylar hem yortular geçirlenerlär, ki uşaklar sevinsinnär , gülsünnär, dedi aktivist Mihail Vlah: «Girginnenerim, açan görerim, ani yavrular bölä şennenerlär, sevinerlär, baarışêrlar. Bölä sevgili geçer onnarın günü. Onun için bölä günnär lääzım olsunnar bütün Gagauziyada».
Moldovada Halklararası Aylä günü 2010 yıldan may ayın 15-ndän nışannanȇr.
Avtor: A. Karapirä, operator hem montaj: Leonid Arfonos
Moldovanın hem Gagauziyanın en mekalı haberleri GRTnın Telegram kanalında!