Canavar ayın 1-dä Gagauziyada yaşlı insannarın gününü bakȇrlar. Saygı, sevgi hem dikkatlık yaşlı insannara pek önemni, çünkü onnar yıllar büyunca saalıklarını devletimizin kurulması uuruna vermişlär.
Yaşlı insannat adetlerimizin, aylä zenginniklerimizin, dolayımızın istoriyası koruycularıydır. Herbir küüydä var ölä insannar, angıları Avtonomiya hem devlet kurulması uuruna çok kuvet koymuş. Büün onnara büük dikkatlıklan bakalım lääzım, nışannadı “Gagauziya Aksakallar nasaatı” asoţiaţiyanın başı Vasiliy Arnaut.
Saygı hem hatır gütmäk soruşlarınınnan bir sırada yaşlı insannarın cümnä kooruması soruşu da durȇr. Çoyuna deyni en büük problemaların arasında gelirlerin küçük olması, mediţina yardımı etmemesi, yakındakılarının tarafından dikkatlıın yoksuzluu, nışannȇȇrlar Gagauziya yaşayannarı.
«Belli bir iş, ani o pensiya parasınınnan yada pasobiya parasınınnan onnara ayakta durmaa pek zor. Biz hepsimiz bileriz ne uurda büün paalar. Amma biz onnardan büün örnek lääzım alalım, çünkü onnar, bakmayarak zorluklara, pek çetin ayaklarında durȇrlar. sayȇrım, ani bizim başımıza bukadar zorluk düşäydi-biz dayanamayaceydık».
«Bän işleerim, vergileri ödeerim, amma açan bolniţaya giderim genä lääzım ödemää. Buna destek mi dener?».
«Benim dolayımda yaşlı insannar yok, hepsi pek erken geçindi hem bän, yaşların büünkü problemalarınınnan karşılaşmadım».
«Eer pensiya parası isläysä hem uşaklar yardım edärseydilär-yaşamaa var nicä, ama eer sıradan pensiya kabledärsän-zorca yaşamaa».
«Büünkä pensiyalarlan ne ilaca, ne dä imeklerä etmeer».
Bitki yıllar gagauziyada yaşlı insannarı desteklemää deyni türlü programalar var, onnarın arasında insannarı doyurmak hem cümnä asistentleri yardımı. Büük yardım “Gagauziya Aksakallar nasaatı”asoţiaţiyasının tarafından geler, nışannadı kurumun başı.
Yaşlı insannar halklaarası günü bu diil sade yortu, ama herbirimizin cuvapçılıı da. Yaşlı insannara saygı gütmäk hem yardım etmäk-bizim borcumuz onnarın zaameti hem saalık vermesi raat geleceemizä.
Moldovanın hem Gagauziyanın en mekalı haberleri GRTnın Telegram kanalında!