Yaz- o diil sade dinnenmäk, ama islää kolaylık kazanmaa para hem türlü becermekleri kabletmää. Moldovada işleer programa «İş erleri studentlär için yazın» adlan.
İlk kazanmış para, tanışmaklar hem büük yaşamasının duyması- te, ne verer gençlerä yaz zamanında işlemäk. Hem taa bir- o adım serbestlää. Moldovada genä işleer programa «İş erleri studentlär için yazın» adlan. Gençlär alatlȇȇrlar kanikulları faydaylan geçirmää.
«Bu pek yardım eder finans tarafından ana-bobaya baalı olmamaa. Bän üürenerim da onnar beni bakȇrlar».
Tehnik universitetin studenti Svetlana Sobor bitirdi 3-cü kursu arhitektura fakultetindä. Her yaz kız kanikullarda işleer. Şindi o yardımcılık merkezindä işleer.
«İlk keret yaşamamda bän işä girdim ofiţiant gibi. Bän beendim işlemää bu uurda. Bän beenerim atmosferayı, kafeyı, eer bän üürenmäydim, ozaman burada işleyeceydim. Neçinki insannan lafedersin, görersin türlü insannarı. Bän taa rumın dilindä da lafederim bu da benim komfort zonam. Bunun için beenerim, ani kablederim eni becermekleri. Kimär keret stres ta olȇr. Ama taa çoyunu beenerim»,- tehnik universitetin student Svetlana Sobor.
Yaz gelmesinnän Moldovada genä çeketti işlemää devlet programası «İş erleri studentlär için yazın» adlan. O verer genç insannara kolaylık kanikullarda işlemää, kabletmää diil sade becermekleri, ama ilk paraları da. Gagauziya iş verän bakannıın haberlerinä görä programa genişlener. Bir zamankı iş erlerini temsil ederlär, nicä erli iş vericileri, ölä da yabancı partnörlar.
«Şindi 9 iş vericisi bütün Moldovadan bu platformada sayıya konuldular hem kendi vakansiyaları belli ettilär. Bu kölnerlär, terbiedicilär uşak başçalarında, lagerlerdä hem mal kaplatırıcıları»,- nışannadı İrina Kara, Gagauziya iş verän bakannıın başın işini götürän.
Bundan kaarä gençlerä veriler kolaylık sınır aşırıda kazanmaa. Kim isteer var nasıl danışsın iş verän bakannıına Komratta.
«Şindi gençlär için hükümet uurunda var annaşmak Moldova hem Bulgariya aralarında yaz zamanında işlemäk için. Şindi var teklif Bulgariya supermarketlerin birkaçı kasir aarȇr. Ödek parası bir bin evrodan yukarı»,- nışannadı İrina.
İş vericilerinä hem studentlerä söleerlär, ani yaz vakıdında işlärkänä lääzım kanona görä bunu yapmaa eer laf gidärsäydi onnar için, kim 18 yaşında taa yok. Gagauziya iş inspekţiya başı İvan Komur nışannadı, ani gençleri taa sık alȇrlar işä HoReCa uurunda, hem da çiftçilik hem düzüntücülük uurlarında.
«İlkin söleerim, ani iş kodeksinä görä 15 yaşınadan işlemää yasak ediler türlü işletmelerdä, türlü sferalarda. 15 yaşından 16 yaşından işlemää var nasıl sade ana-boba kayıl olarsaydı, 16 yaşından 18 yaşınadan gençlär var nasıl işlesinnär sormayıp ana-bobasını, ama sade o bölümnerdä, angıları belli hükümetin kararında. Laf gider iş için, angısı baalı tütünnän, himikatlarlan gecä zamanında hem başka iş soyları»,- urguladı İvan Komur.
Genç insannar çekederlär işlemää kanikullarda, becermekleri kablederlär hem da ilk adımnarı büük yaşamaya yapȇrlar.
Moldovanın hem Gagauziyanın en mekalı haberleri GRTnın Telegram kanalında!