Kongaz küündä «Concordia» soţial yardım merkezin çalışması ilerleer. Bu yıl, o genä altıncı sıra, açtı günnük dinnenmäk merkezin kapularını uşaklara deyni. On günün içindä uşaklar etiştirerlär hem dinnenmää, hem toplamaa kuvet eni okul yılına deyni. Bunun için burada var hepsi lääzımnı koşullar — üç keret doyurȇrlar uşakları, akrannar hem zengin oyun programası. Bu yazın bitki smenasında merkezdä dinnendilär 20 uşak.
Dışarda sıcak yaz vakıdı. Sevinmelii hem şennii, yaz kanikullarından, doludan duydular Kongaz küündä bulunan gündüz dinnenmäk merkezindä uşaklar. Şindiki zaman 20 uşak geçirer burada kendi yaz zamanını. Burada, adetä görä, sabaa herzaman hayırlı hem gözäl başlȇȇr. O çekeder imektän. İmäk burada çeşitli hem zengin, karşılamaa deyni büüyän güüdenin havezini. Sabaa ekmektän sora herkezi çıkȇr sokaa geçirmää muzıkalı sport sınışlarını.
Sabaakı sport yardım eder uşakları doldurmaa havezlän hem energiyaylan, ko etsin bütün günä kadar. O onnara lääzım olacȇk, çünkü bundan sora uşaklarda zengin hem zanaatlı bir gün başlȇȇr. Merkezin başı Tatyana Uzun annadȇȇr, ani gündüz merkezi çalışȇr kurulmuş programaya görä, angısına girer sport yaraşmakları, el ustalık saatları, eksperimentlär, türlü master-klasslar. Uşaklar yaradıcılıklan zanaatlanȇrlar, dinnenerlär, sözleşerlär, kendinä dost bulȇrlar. En önemni burada – taa aaz vakıt geçirmää telefonnarda hem taa çok lafetmää, faydalı geçirmää vakıdı açık havada.
«Uşaklar bulunȇrlar bizim merkezimizdä saat 10 saat 4-dän. Burada onnar uzmannarın gözaltında bulunȇrlar, onnara deyni geçireriz türlü oyunnarı, konkursları, viktorinaları, kino göstereriz. Her gün neysä diişiler. Bugün kvest yapȇrız, öbür sport yarışmaklarını, estafetaları, başka gün resimneeriz, boyȇȇrız»,- söledi Tatyana Uzun.
Olaylar hem oyunnar burada bölünmüş uşakların meraklıına görä. Onuştan herkezi kendinä bişey sa bulabilecek.
«Biz kurduk herbir günü ölä, ani uşaklar darsımasınnar, onnara meraklı olsun. Büün geçirdiysäk yaradıcılık –terapiyasını, sabaa geçireciiz eksperimentleri, ellän neysä yapȇrız. Onnarın da keyfinä dikkat olȇrız, onnara meraklı osun. Uşaklar gelerlär burayı havezlän. Biz sä yapȇrız ölä, ani onnarı meraklandırmaa, onnarın istemeklerinä dikkat olup»,- dedi pedagog Tatyana Arnaut.
Büünkü gün uşaklarda başladı sport yarışmaklardan. Onnar pay edildilär takımnara da yarışta pay alȇrlar. Her yarışa bir duygu furtunası hem baarışlar katılȇr, çünkü herbiri kendi komandasına enseyiş isteer. Yaradıcılık zamanı sporttan sora geler. Uşakların fantaziyası burada açıklanȇr doludan. Herbir uşak geler evä diil sadece emoţiyalarlan, ama kendi el yapımlarşnnan da.
«Burada uşaklar açȇrlar kendilerini, gösterip kendi becermeklerini hem talantını. Kimsä isteer annatmaa şiir, kimsä türkü çalmaa, kimsä gimnastikayı yapȇr. Savaşȇrız hem yardım ederiz analar-bobalar da taa ii görsünnär kendi uşaklarını. Açȇrız uşakların becermeklerini, çünkü bunu vakıtta yapmarsaydık, var nicä esap almamaa, ani uşak becerilki. Bu iki aftanın içindä biz göreriz, ani bir uşak muzıkayı beener, öbürü – sportta kaavi. Annadȇrız analara-bobalara, neyi esap aldık onnarın uşaklarında»,- nışannadı pedagog.
«Her iki aftada, açan kapȇȇrız dinnemäk smenayı, biz teklif ederiz burayı anaları-bobaları, neredä açıklȇȇrız uşakların çıkışlarını, annadıp ne esap aldık hem nesoy potenţial onnarda var. Bütün vakıdın içindä olȇrız onnara destek hem yardım ederiz açmaa onnarı»,- merkezin öndericisi Tatyana Uzun nışannadı.
Uşaklar da söleerlär, ani beenerlär geçirmää burada gündüz vakıdını hem darsımak için zaman yok.
«Beeneriz oyunnarı burada, dans ederiz. Hepsi meraklı».
«Beenerim asker oyunu burada. Sallangaçta sallanȇrız,monopoliya, UNO oyunu oynȇȇrız, küçük aşçı oyunu var. Eer olursa, bän isteerim genä burayı gelmää».
Nışannȇȇrız, ani gündüz dinnenmäk merkezi çalışȇr atrık 6 yıl , olup bir aktiv hem faydalı er vakıdı geçirmäk için. Bundan kaarä, bu yılın merkezdä geçer akţiya «Bän dä isteerim üürenmää», angısına görä satın alınȇrlar cantalar hem okul tertipleri. Onnar olacȇk destek gibi zor durumda bulunan aylelerä.