Aydar küüyün T. Angeeli adına gimaziyasında geçti «Yıldızcik» festivali, onda pay aldı 8 üürenmäk kurumu Çadır dolayından. Bu oluş geçirildi anılmış yazıcının, diplomatın Todur Angelinin 90 yıldönümünä. Hem hep ölä uşaklar hazırladılar dokladları insannar için, kimin adını taşıyȇrlar onnarın üürenmäk kurumnarı.
Üürenmäk kurumnarın aralarında festivalin musaafirlerini karşıladılar tuzlan ekmeklän, sergiylän, neredä pay alannar tanıştılar o insannarlan, kim braktı büük iz gagauzların istoriyasında, kulturasında hem dilindä. Hem kim büün tanıttırȇr halkımızı aşırıda. Bu Pötr Petkoviç, Lübov Çimpoeş, Gavriil Gaydarji, Georgiy Sırtmaç, Todur Angeli hem başkaları. Nicä urguladı Aydar küüün T. Angeli adına gimnaziyanın başı Nadejda Koçanjı , bölä oluşlar lääzım geçirilsinnär herbir üürenmäk kurumunda.
«Biz koyduk ölä bir neet, diil sade toplamaa, ama anmaa te o insannarı, adamnarı, kim ilerletti bizim halkımızı. Todur Angeli o bir şılak yıldız bizim Aydar küüyümüzdä. Düşündük ölä, ani herbir küüdä var ölä bir anılmış adam, sayȇrız, ani herbir üüredici hem üürenici, lääzım götürsün gelecää bizim evlat boylarımıza»,- urguladı Nadejda Koçanjı.
Uşaklar büük havezlän tanıştırdılar musaafirleri kendi dokladlarınnan, angılarını hazırladılar kendi üüredicilerinnän.
«Bu bizim okulun kahramanı, Georgiy İvanoviç Sırtmaç, o çok bir büük adam bizim Gagauziyada. O gösterdi kendi girginniini, bizim okul onun adını taşıyȇr. Biz büün geldik annatmaa onun için».
«Bizim okulumuz-uşak başçamız taşıyȇr onun adını. Bu adam kendi yıllarında başarmış bizim okulu, da sora doksanıncı yıllarda çekeder perestroyka, da o kableder ölüm. Da girer istoriya sayfalarına nıcä bir kahraman. Biz onunnan hodullanȇrız, çok onu severiz. Uşaklarımız hazırladı onun için annatmaları. Biz onu herkeret anȇrız».
Uşaklar festivaldä gösterdilär kendi becermeklerini gagauz dilindä annadıp şiirleri, çaldılar türkü hem gagauz halk oyunnarınnan sevindirdilär musaafirleri. Nicä urguladılar uşaklar, bölä oluşlara lääzım katılmaa, da ilerletmää dilimizi, kulturamızı hem adetlerimizi.
Kazayak küüyün okulun üüredicisi Svetlana Dülger nışannadı, ani Aydar gimnaziyası pek zengin, bereketli, çünkü uşaklar savaşȇrlar lafetmää gagauz dilindä.
«Biz dä savaşȇrız uşakları üüüretmää sevmää ürektän ana dilini. Unutmasınnar, ani dünnedä ana dili en paalı, nicä ana, nicä toprak, vatan, onnar hepsi baalı biri-birinä. Diil lääzım unutmaa dilimizi, biz unudarsak, bizim uşaklar bilmeyeceklär onu»,- Svetlana Dülger nışannadı.
Uşaklar urguladılar, ani lääzım üürenelim dilimizi, koruyalım onu, hem lafedelim onda. Nicä söledi Üüretim bakanı Natalya Kristeva o hodullanȇr üürenicilärlän, üüredicilärlän, ani Gagauziyada taa bir adet peydalandı. Okullar teklif ederlär kollegalarını, uşakları dostlaşmaa, ki göstermää kendi becermeklerini. Bölä adet şindän var uşak başçalarında, söledi Natalya Kristeva.
«Da büün pek lääzımnı festival, o adalı bizim anılmış yazıcının, diplomatın Todur Angelinin 90-cı yıl dönümünä. Da bu gimnaziya koruyȇr bu insanın anmasını, savaşȇrlar hepsini vermää, ne bilerlär uşaklar bu adam için. Beni sevindirdi, ani uşaklar başka küülerdän dä, angıları geldilär, annattılar anılmış insannar için, angıları yaşȇrlar yada yaşardılar onnarın erlerindä. Bu pek ii, açan bizim uşaklar severlär adetleri, dilimizi, ne biz büün göreriz»,- söledi Üüretim bakanı Natalya Kristeva.
Festivalin hepsi pay alannarı keblettilär hazırlayıcılardan diplomnarı hem baaşışları.
Moldovanın hem Gagauziyanın en mekalı haberleri GRTnın Telegram kanalında!