Çadır – Lunga dolayın Baurçu küüyündä soţial önemliindä sokaanda yol yapılȇr. Yol brusçatkaylan yapılacek. Yolun düzülmesi yaşamak erlerindä yolları yapmak fondundan finanslanȇr. Proektin paası 648 bin ley.
Baurçu küüyün «Mayın 1» sokaanda yol yapılȇr, işlär iki gün geeri çekettilär. Yolun uzunnuu 300 m, brusçatkaylan döşenecek. Sokak uşak başçasına hem mezarlaa götürer. Herbir yaamurlu hava yoldan topraa, taşları, gübürleri regional yolun üstünä çıkarardı. Problemayı erli kuvetlär kendileri çözärdilär.
«Bizdä burada uşak başçası, ikinci numara. Postovşiklär, angıları imek mallarını uşaklara getirerlär, herzaman problemalarlan karşı gelerlär. Yaamur yaadıkça çakıllar yol üstünä çıkardılar. Bu bizim merkez yolumuz Komrat-Kongaz-Baurçu-Çadır-Lunga herzaman problemaydı. Hepsi gübürlär yola çıkardılar. Kendi kuvedimizlän onnarı paklaardık»,- dedi primar.
Dolayın yaşayannarı yolun yapmasını çoktan beklärdilär.
«Çok onu bekledik, ani çekettiriler, pek islää. Burada büük yaamur oldu, hepsi kum, çakıl burayı geler. Bölä islää olacek».
«Kalkȇrız mezarlaa her cumertesi, pek zor oymaklı yolda kalkınmaa. İlinnedecek bizim gezmemizi, troturdan taa yukarı çıkardık».
«Biz bu trotuarcaa da sevinärdik. Şindi transporda da islää olacek».
Yol yapılȇr zamandaş tehnologiyalarına görä, ki kaavi olsun hem zaman zorluklarına dayansın.
«Yolun genişlii 4 m. Uzunnuuna 300 m.-1200 kv. Bordürlar, ţement var»,- ekledi primar.
«Düzelttik bütün yolu. Sora çekedecez bordürların erlerini. Koyȇrız bordürları, döşeriz şebeni da çekederiz brusçatkayı koymaa. Düşünerim, ani bir aya kadar burasını bitirecez»,- söledi brigadir.
Proekt doorudulu yolun kaliteli yapmasına. Küüdä yaşamayı taa ii uura getirmää programasına görä yol düzüler. Bu uura Yol fondundan 920 bin ley verildi. Tenderdan sora paa 648 bin leyä indi. Yolu podrädçik bu ayın bitkisinädän neetli başarmaa. Mayın 1- sokaan ikinci payını, taa 300 metrayı erli kuvetlär gelän yıla adȇȇrlar yapmaa.