Tabiatı korumak ministerlii haberledi, ani kimi düzmäk için himiya malların importu, yapması, satmasıhem kullanması yasak edilecek. Bu karar kabledildi neetlän korumaa tabiatı. Taa derindän bizim materialımızda.
Tabiatı korumak ministerliin açıklamasına görä, yasak edilecek düzülcülük hem himiya materialları hem başka mallar, angılarında asbest kullanılȇr.
«Bu yasak etmäk kullanmayacek sadece o düzmäk materiallara hem mallara, angıları yapılıydı asbesttan 2016-cı yılın büük ayın 20-dan. Onnarı sataceklar taa skladlarda bitmeyincä. Bundan kaarä yasak edildi kurşum karbonatların hem sülfatların, rtuti, mışyak, kadmiy hem kalay birlişiklerin kullanması. Düzmäk industriya uurunda bu himiya elementleri sıkça girer boyalaların içinä, onnar kullanılȇr taftaların işlemesindä. Hep bu himiya elementlärlän yıslanılȇrlar indüstriya tekstilleri, angıları duarları hem erleri örtmäk deyni kullanılȇrlar. Hep ölä butakım aaç taftaları hem boya malları, angıların içinä bu elementlar girerlär, diil lääzım satılsınnar»,- Tabiatı korumak ministerlii haberleer.
Nicä nışannadı cümnä Saalık merkezi uzmanı Ȇlidiya Kıssa, butakım himiya elementleri zararlȇȇr insannarın saalını da.
«İlk, bu toksik elementleri, aar metallar soluktan insanın içinä girer. Bu metallar toza dönüşer da biz hepsimiz onnunnan soluyȇrız. Bu komponentlar — kurşum, rtuti, mışyak zararlȇrlar en ilkin merkez nerva sistemasını da büük imik bozuluklarını belli eder»,- dedi uzman.
Uzman çizgileer, ani bu komponentlardan çıkan parçacıkları toplanılȇr insanın güüdesindä da uzun vakıtta konvülsiyalara, orientațiya hem geziș bozukluklarına var nicä getirsin.
«Lääzım dikat olalım, açan satın alȇrız malları. Onko hastalıkları – o en büük zarar, angısına var nicä karşı gelmää. Bu aar metallar kullanılȇr diil sadece industiyada, ama evdä dä, açan siz onnarı düşünmeyeräk soluyȇrsınız. Hep o emal kapları, onnarda da kurșum boyaları kullanılȇr. Kırılmış yada çatlak olursa, kapların zararı taa çok olacek. Onuştan hiç kullanmayın onu imeyi yapmak için»,- nışannadı uzman.
Nicä nışannadılar Tabiatın korumak ministerliindä, butakım karar kabledildi baș neetlän — korumaa insannarın saalını hem tabiatı.
Moldovanın Gagauziyanın en mekalı haberleri GRTnın Telegram kanalında!